ភ្នំពេញ៖ ឯកឧត្តម វ៉ាង វិនធាន ឯកអគ្គរដ្ឋទូតចិនប្រចាំនៅកម្ពុជា បានអះអាងថា កិច្ច​សហប្រតិបត្តិការខ្សែក្រ វាត់មួយ-ផ្លូវមួយ រវាងកម្ពុជា-ចិន មិនត្រឹមតែផ្ដល់ផលប្រយោជន៍​ដល់ប្រទេសទាំងពីរប៉ុណ្ណោះទេ និងបាន រួមចំណែកផ្ដលភាពវិជ្ជមាន សន្តិភាព និងវិបុលភាពដល់តំបន់ ហើយឥទ្ធិពលរបស់កម្ពុជា ក៏កំពុងត្រូវបាន លើកកម្ពស់ ទាំងក្នុងតំបន់ និងឆាកអន្តរជាតិ ។

ក្នុងពិធីសម្ពោធដាក់ឱ្យដំណើរការរោងចក្រផលិតសម្បកកង់រថយន្ត ដើម្បីអបអរសាទរខួបលើកទី ១០ នៃ “គំនិតផ្តួចផ្តើមខ្សែក្រវាត់មួយ-ផ្លូវមួយ” នៅតំបន់សេដ្ឋកិច្ចពិសេស ក្រុងព្រះសីហនុ នៅ​ថ្ងៃទី២២ ខែឧសភានេះ ឯកឧត្តម វ៉ាង វិនធាន បានលើកឡើងបញ្ជាក់ថា ក្នុងរយៈពេល ១០ឆ្នាំកន្លង​ម​កនេះប្រទេសទាំងពីរ បានប្រកាន់ខ្ជាប់នូវគោលគំនិត​ នៃការពិគ្រោះយោបល់រួមគ្នា ការកសាង​រួមគ្នា និងចែករំលែករួមគ្នា ហើយការកសាងនូវខ្សែក្រវាត់មួយ-ផ្លូវមួយប្រកប​ដោយគុណភាពខ្ពស់ ហើយការបន្ស៊ីគ្នា នៃគំនិតខ្សែក្រ វាត់មួយ-ផ្លូវមួយ ​និងយុទ្ធសាស្ត្រចតុកោណរបស់កម្ពុជា មានភាពកាន់តែស៊ីជម្រៅ ។

ឯកឧត្តម បានបញ្ជាក់បន្ថែមថា ក្នុងរយៈពេល១០ឆ្នាំមកនេះ​ ប្រទេសចិន បានជួយកម្ពុជា លើ គម្រោង​សុខុមាលភាព​ជាច្រើន ដូចជាការអប់រំ ការថែទាំវេជ្ជសាស្ត្រ ​ការកាត់បន្ថយភាពក្រីក្រ និង​ការអភិវឌ្ឍជនបទ ​និងគម្រោងធំៗមួយចំនួនទៀត ​គឺមានពហុកីឡដ្ឋានជាតិ​មរតកតេជោ ផ្លូវ​ល្បឿនលឿន ភ្នំពេញ-ព្រះសីហនុ និងអាកាសយានដ្ឋានសៀមរាបអង្គរថ្មី ដែលនេះបង្ហាញ​ពីកិច្ចសហប្រតិបត្តិការល្អ នៃខ្សែក្រវាត់មួយ-ផ្លូវមួយ រវាងប្រទេសទាំងពីរ ។

ឯកឧត្តមឯកអគ្គរដ្ឋទូតចិន បានបង្ហាញនូវការសប្បាយរីករាយ ​ចំពោះសម្ដេចតេជោ ហ៊ុន សែន នាយករដ្ឋមន្ត្រីនៃកម្ពុជា ក្នុងអាណត្តិទី៦នេះ សម្រេចបានដោយជោគជ័យនូវស្ថិរភាពនយោបាយ​សង្គមរក្សាបាននូវកំណើនសេដ្ឋកិច្ចយ៉ាងឆាប់រហ័ស ​ក្នុងរយៈពេលច្រើនឆ្នាំជាប់ៗគ្នា និង​សម្រេច​ជោគជ័យយ៉ាង​មុតមាំ​លើការប្រយុទ្ធប្រឆាំងនឹងជំងឺកូវីដ-១៩ បំពេញភារកិច្ចរបស់ប្រធាន​អាស៊ាន​ឆ្នាំ២០២២ ប្រកបដោយកម្រិតខ្ពស់ និងបានរៀបចំព្រឹត្តិការណ៍ស៊ីហ្គេមលើកទី៣២ ប្រកបដោយ​ជោគជ័យ​យ៉ាងពេញលេញ ដែលសព្វថ្ងៃនេះ ​ទំនុកចិត្តរបស់ប្រជាជនកម្ពុជា ​កម្លាំងប្រមូលផ្ដុំ កំពុង​កើនឡើងឥតឈប់ឈរ ហើយឥទ្ធិពលក្នុងតំបន់​ និងឆាកអន្តរជាតិ ត្រូវបានលើកកម្ពស់យ៉ាងខ្លាំង ៕អត្ថបទ៖ បាន សុខរិទ្ធិ