ភ្នំពេញ៖ប្រទេសកម្ពុជា អាចដណ្តើមមេដាយមាសបានច្រើនហួសពីការរំពឹងទុក ពីព្រឹត្តិការណ៍ស៊ីហ្គេមលើក ទី៣២ ឆ្នាំ២០២៣ គឺដោយសារកក្តាចិត្តសាស្រ្តកីឡាបានជំរុញខ្លាំង។ នេះបើតាមប្រសាសន៍ ឯឧត្តម វ៉ាត់ ចំរើន អគ្គលេខាធិការ នៃគណៈកម្មាធិការជាតិរៀបចំព្រឹត្តិការណ៍ស៊ីហ្គេម និងអាស៊ានប៉ារ៉ាហ្គេម (CAMSOC-CAMPAPGOC) ។

នៅក្នុងកិច្ចសម្ភាសន៍ជាមួយBTV នៅថ្ងៃទី២២ ខែឧសភា នេះ ឯកឧត្តម វ៉ាត់ ចំរើន បានបញ្ជាក់ថា តាមផ្លូវបច្ចេកទេស ប្រទេសកម្ពុជា ​រំពឹងទុកថា នឹងទទួលបានមេដាយមាសចំនួន៥០គ្រឿង ប៉ុន្តែលទ្ធផលជាក់ស្តែងប្រទេសកម្ពុជា ដណ្តើមបានមេដាយមាសចំនួន៨១គ្រឿង ហួសពី​ការរំពឹងទុក។

កត្តា​ដែលធ្វើឱ្យកម្ពុជាទទួលបានមេដាយមាសច្រើន​ មិនធ្លាប់មានពីមុនមកនេះ គឺដោយ​សារ​កត្តា​ចិត្តសាស្រ្តកីឡាជំរុញខ្លាំង​ ដែលទទួលបានការគាំទ្រពីថ្នាក់ដឹកនាំ ​សាច់ញាតិ និង​មនុស្សជាទីស្រលាញ់ជាដើម។

ព្រឹត្តិការណ៍កីឡាអាស៊ីអាគ្នេយ៍ ឬហៅថា ស៊ីហ្គេម លើកទី៣២ ឆ្នាំ២០២៣ ដែលប្រទេសកម្ពុជា ធ្វើ​ជា​ម្ចាស់ផ្ទះលើកដំបូង ​ដោយរង់ចំាអស់រយៈ៦៤ឆ្នាំនោះ​ បាន​បិទ​បញ្ចប់​ទៅ​ដោយជោគជ័យ កាលពីថ្ងៃ ទី១៧ខែឧសភានេះ ។

ក្នុងព្រឹត្តិការណ៍នេះប្រទេសកម្ពុជា ​ដណ្តើមបានមេដាយសរុបចំនួន ២៨២គ្រឿង ​ក្នុងនោះរួមមាន មេដាយមាស​ ចំនួន៨១គ្រឿង ប្រាក់ ៧៤គ្រឿង និងសំរិទ្ធ ចំនួន១២៧គ្រឿង។ ចំនួនមេដាយ ដែល​ប្រទេសកម្ពុជាដណ្តើមបាននេះ​ ឈរលំដាប់ថ្នាក់លេខ៤ ​ក្នុងចំណោមប្រទេសទាំង១១​ ដែល បាន​ចូលរួមព្រឹត្តិការណ៍ស៊ីហ្គេមលើកទី៣២៕អត្ថបទ៖ ទូច សោភ័ណ