ភ្នំពេញ៖ មនី្ទរពេទ្យកុមារជាតិ នៃក្រសួងសុខាភិបាល ព្រឹកថ្ងៃទី២២ ខែឧសភា ឆ្នាំ២០២៣នេះ បានទទួលសម្ភារៈបរិក្ខារវេជ្ជសាស្រ្តផ្នែកជំងឺភ្នែក ពីក្រុមហ៊ុន Visioncare Corporation Ltd. ក្រោមជំនួយរបស់ទីភ្នាក់ងារសហប្រតិបត្តិការអន្តរជាតិកូរ៉េ (កយកា-KOICA)។

ឯកឧត្តម សាស្រ្តាចារ្យ ញឹប អង្គាបុស្ស នាយកមនី្ទរពេទ្យកុមារជាតិ បានថ្លែងថា សម្ភារៈបរិក្ខារវេជ្ជ​សាស្រ្ត​ផ្នែកជំងឺភ្នែកនេះ ​គឺសម្រាប់ពិនិត្យ ​ព្យាបាលជំងឺជូនទារកទើបនឹងកើតភ្លាមៗ កុមារ និងរហូតដល់មនុស្សពេញវ័យ(ក្មេង ចាស់ ប្រុស ស្រី)។

ទន្ទឹមនឹងនោះមនី្ទរពេទ្យកុមារជាតិ ក៏មានគោលបំណងបើកដំណើរការពិនិត្យ ព្យាបាលជំងឺភ្នែក សម្រាប់ទារក និងកុមារ ក្នុងនោះមនុស្សចាស់​ ក៏អាចមកទទួលសេវាបានផងដែរ ក្នុង​ករណីគាត់ចង់មកទទួលសេវាពីក្រុមការងារគ្រូពេទ្យ ​នេះជាចំនុចសំខាន់។ និយាយដោយឡែកទារក កើតមកមានបញ្ហាភ្នែកច្រើន។

ចំណែកកញ្ញាវេជ្ជបណ្ឌិត អន សុខចេង គ្រូពេទ្យឯកទេសភ្នែក នៃមនី្ទរពេទ្យកុមារជាតិ បាន​បញ្ជាក់ថា ការកើតជំងឺភ្នែក​ញឹបញាប់​ គឺភាគច្រើនសម្រាប់ទារក​ កើតមកមិនគ្រប់ខែ អាណាព្យាបាល​ត្រូវយកទារកនោះ មកពិនិត្យបាតភ្នែកជាចាំបាច់បំផុត ព្រោះថាទារកនោះ អាចមានបញ្ហាបាតភ្នែក ​ដោយការលូតលាស់របស់ទារកនោះ មិនទាន់គ្រប់គ្រាន់។ ក្នុងករណីគ្រូពេទ្យពិនិត្យជូនទារកនោះថា មានបញ្ហាបាត គឺយើងព្យាបាលជូនបានទាន់ពេលវេលា ដំណាក់កាល​ខ្លះត្រូវព្យាបាលភ្លាមៗ ​ដំណាក់កាលខ្លះត្រូវធ្វើការតាមដាន តាមស្ថានភាពជំងឺ​ជាក់ស្តែងរបស់ទារកនោះ។ ព្រោះវាចំណេះដឹងមួយ ទាំងប្រជាពលរដ្ឋ ​និងគ្រូពេទ្យ​ ត្រូវតែដឹង ដោយហេតុថា​មានប្រជាពលរដ្ឋមួយចំនួន ​កូនកើតមកមិនគ្រប់ខែ ​មិនបានតាមដានលើចំណុចនេះ នោះទេ​ ភាគច្រើនអាណាព្យាបាល ​ចាប់អារម្មណ៍តែលើបេះដូង ​សួត ​ជាដើម។ គាត់មិនដឹងថា កូនកើតមកមិនគ្រប់ខែ ត្រូវយកមកពិនិត្យភ្នែកនោះទេ។

ទន្ទឹមនឹងនោះក្រុមការងារគ្រូពេទ្យ​ ក៏ត្រូវតាមដានពីចំនួនគីឡូរបស់ទារកដែលទើប​នឹងកើត និង​តាមដានលើករណីជំងឺផ្សេងៗផងដែរ៕អត្ថបទ រដ្ឋា