យ៉ាងហោចណាស់មនុស្ស ១៥នាក់ បានស្លាប់ និងជាង ៣៦.០០០នាក់ ត្រូវបានបង្ខំឲ្យចាកចេញពីលំនៅឋានរបស់ខ្លួនដោយសារតែទឹកជំនន់ដ៏ធំ នៅភាគឦសាននៃប្រទេសអ៊ីតាលី ក្នុងសប្តាហ៍នេះ។

ភ្លៀងធ្លាក់យ៉ាងខ្លាំង បានបណ្តាលឲ្យមនុស្សជិត ២០.០០០នាក់ គ្មានអគ្គិសនីប្រើប្រាស់ ហើយ​មនុស្សជាច្រើន ​បានបោះចោលសម្ភារៈប្រើប្រាស់ដែលត្រូវបានបំផ្លាញដោយភក់ល្បប់។ ផ្លូវនានា នៅ Forlì ដែលជាទីក្រុងមួយ​ ក្នុងចំណោមទីក្រុងនៃក្នុងតំបន់ Emilia Romagna ដែលរងការវាយ​ប្រហារ​ដោយទឹកជំនន់ ឥឡូវនេះ បានបង្ហាញឲ្យឃើញទ្រព្យសម្បត្តិរបស់ប្រជាជន ដែលមិនអាច​ប្រើប្រាស់​ទៀតបាន រួមមានសាឡុង កៅអី ទូរទស្សន៍ ពូក ស៊ុមគ្រែ និងទូដាក់ចានជាដើម។

អ្នកស្រុកម្នាក់បានប្រាប់សារព័ត៌មាន The Mirror ថា បន្ទាប់ពីគ្រោះទឹកជំនន់ដ៏អាក្រក់ ដែលបាន​ជំរុញឲ្យមានការប្រកាសអាសន្នពណ៌ក្រហម​ នៅក្នុងតំបន់នោះ ប្រជាជននៅក្នុងតំបន់ និងអ្នកឯទៀត នៅក្នុងទីក្រុង និងទីប្រជុំជននានា បានបង្ហាញពីសាមគ្គីភាពរបស់ពួកគេ តាមរយៈការជួយអ្នកដែលរងគ្រោះយ៉ាងធ្ងន់ធ្ងរនេះ។

ប្រភពដដែលបានបន្តថា៖ «ប្រជាជនទាំងអស់ ខំអស់ពីសមត្ថភាពដើម្បីជួយសង្គ្រោះ ពោល​គឺមានការសាមគ្គីគ្នាយ៉ាងខ្លាំង។ បើទោះក្នុងស្ថានភាពធ្ងន់ធ្ងរបែបនេះ ក៏អ្នករាល់គ្នាមានឆន្ទៈជួយ​គ្នាដែរ។ ថ្ងៃនេះ អ្នកស្ម័គ្រចិត្ត កំពុងបរិច្ចាគស្បែកជើងកវែង និងប៉ែល ហើយមនុស្សជាច្រើន​កំពុងចូលរួមកិច្ចប្រឹងប្រែងនេះ ដើម្បីយកល្បាប់ភក់ចេញពីផ្ទះប្រជាជន និងពីផ្លូវ»។

រូបភាពដ៏រំជើបរំជួលមួយ ​ដែលត្រូវបានផ្សព្វផ្សាយនៅលើបណ្ដាញសង្គម ​ដោយនគរបាលរដ្ឋអ៊ីតាលី បានបង្ហាញ​ឲ្យឃើញពីកុមារម្នាក់ត្រូវបានជួយសង្គ្រោះចេញពីភក់ ក្នុងអំឡុងកិច្ចប្រឹងប្រែងជួយ​សង្គ្រោះ នៅទីក្រុង Massa Lombarda ដែលជាសហគមន៍មួយ ក្នុងខេត្ត Ravenna។

នគរបាល បានបង្ហោះសារថា៖ «ឥឡូវនេះ កុមារម្នាក់មានសុវត្ថិភាព នៅក្នុងដៃរបស់​នគរបាល​ស្រីម្នាក់ មកពីអង្គភាពចល័ត ដែលបានមកដល់ ដើម្បីជួយប្រជាពលរដ្ឋនៅទំបន់ Emilia Romagna។ រូបភាពដែលបានផ្តល់ក្តីសង្ឃឹម​ឲ្យយើង ជាមួយនឹងក្តីប្រាថ្នាថា ​ពួកយើងនឹងអាចត្រឡប់​ទៅរស់នៅ​ជាមួយភាពស្ងប់ស្ងាត់ ក្នុងពេលឆាប់ៗនេះវិញ»៕