ការតវ៉ាដ៏ធំបានផ្ទុះឡើងនៅក្នុងរដ្ឋធានីសេអ៊ូល ប្រទេសកូរ៉េខាងត្បូង កាលពីថ្ងៃសៅរ៍ ប្រឆាំងការជំរុញរបស់ប្រទេសជប៉ុន សម្រាប់ផែនការបញ្ចេញទឹកមានផ្ទុកសារធាតុពុលនុយក្លេអ៊ែរ ដ៏ចម្រូងចម្រាស់ពីរោងចក្រនុយក្លែអ៊ែរ Fukushima ដែលមិនដំណើរការ ចូលក្នុងមហាសមុទ្រ។

ក្រុមអ្នកតវ៉ាបានមកប្រមូលផ្តុំគ្នា នៅតាមដងផ្លូវនៅទីក្រុងសេអ៊ូលភាគកណ្តាល ដោយបានស្រែក​ពាក្យស្លោកផ្សេងៗ ​និងមានកាន់ផ្ទាំងប្រកាសដោយថ្កោលទោសវិធានការ​តាមផែនការ​របស់ប្រទេសប៉ុន។

អ្នកតំណាងជាច្រើនមកពីក្រុមស៊ីវិលផ្សេងៗ​ និងគណបក្សនយោបាយប្រឆាំង រួមទាំងគណបក្ស​លទ្ធិប្រជាធិបតេយ្យ និងគណបក្សយុត្តិធម៌ បានថ្លែងសុន្ទរកថា អំពាវនាវឲ្យរដ្ឋាភិបាលកូរ៉េខាងត្បូង​ចេញ​មកទប់ស្កាត់ប្រទេសជប៉ុនកុំឲ្យបំពុលសមុទ្រ។

ប្រជាជនមួយចំនួននៅក្នុងប្រទេស និយាយថា វាពុំមែនជាទឹកមានសារធាតុពុលនុយក្លេអ៊ែរនោះទេ ប៉ុន្តែ ​ជាទឹកដែលត្រូវបានធ្វើប្រព្រឹត្តិកម្មហើយ​ពុំមាន​ការចាំបាច់​សម្រាប់​គណៈប្រតិភូកូរ៉េខាងត្បូង ដើម្បីនាំយកគំរូនៃទឹកកខ្វក់នេះដើម្បីមកបញ្ជាក់នូវអ្វីដែលពួកគេបាន​និយាយនោះទេ ហើយពួកគេ​ក៏បានប្រាប់អ្នកផ្សេងទៀតដើម្បីឲ្យនិយាយថា​ ការផឹកទឹនេះវាពុំមានបញ្ហានោះទេ។

ក្រុមអ្នកតវ៉ា ​និយាយថា ​ផែនការបញ្ចេញទឹកចូលមហាសមុទ្រ នៅពេលដែលត្រូវបានជំរុញ​ឲ្យ​បន្តដំណើរ​ការទៅមុខ​ វានឹងបណ្តាលឲ្យមានផលប៉ះពាល់ធ្ងន់ធ្ងរចំពោះ​បរិស្ថាន​សមុទ្រ និង​សុខភាពមនុស្ស ​ព្រមទាំងមនុស្សជំនាន់ក្រោយ។

យោងតាមអ្នកតវ៉ាផ្សេងទៀត បានឲ្យដឹងថា វាជាការមិនទទួលខុសត្រូវទាល់​តែសោះ​សម្រាប់​ប្រទេស ​ជប៉ុនក្នុងការបញ្ចេញទឹកដែលមានសារធាតុប្រភេទនេះចូល​ទៅក្នុង​ធនធាន​ដ៏មានតម្លៃ ​ដែលប្រើប្រាស់រួមគ្នាដោយមនុស្សជាតិ​ ដោយគ្មានការពិចារណាពីផលវិបាក៕