ភ្នំពេញ៖ កម្លាំងគណៈបញ្ជាការឯកភាពខណ្ឌ៧មករា បានចុះរៀបចំសណ្ដាប់ធ្នាប់ ឲ្យមានលក្ខណៈល្អប្រសើរឡើងវិញ នៅបរិស្ថានអនាម័យ សណ្ដាប់ធ្នាប់សាធារណៈ ដែលកន្លងមកទីតាំងយានដ្ឋានជួលជុលរថយន្តមួយកន្លែងត្រូវបាន រំលោភលើចិញ្ជើមផ្លូវ ឲ្យធ្វើបាត់បង់សណ្ដាប់ធ្នាប់ និងបង្កការកក់ស្ទះចរាចរណ៍ផងដែរ។

ជាក់ស្ដែងនៅរសៀលថ្ងៃទី២២ ខែឧសភា ឆ្នាំ២០២៣ លោក ថេង សុថុល អភិបាលខណ្ឌ៧មករា បានចាត់ឲ្តលោក ក្រូច សុធន់ នាយករងរដ្ឋបាលខណ្ឌ ចុះដឹកនាំកម្លាំងគណៈបញ្ជាការឯកភាពខណ្ឌ៧មករា រៀបចំសណ្ដាប់ធ្នាប់នៅចំណុច យានដ្ឋាន តាមបណ្ដោយផ្លូវលេខ១៥៦ កែងផ្លូវលេខ ២១៣ សង្កាត់វាលវង់ ខណ្ឌ៧មករា រាជធានីភ្នំពេញ។

លោក នាយករងរដ្ឋបាលខណ្ឌ៧មករា បានឲ្យដឹងថា កម្លាំងគណៈបញ្ជាឯកភាពខណ្ឌ បានចុះរៀបចំសណ្ដាប់ធ្នាប់ ក្នុងមូលដ្ឋានជាប្រចាំ ទាំងផ្លូវតូច និងផ្លូវធំ ជាពិសេស មហាវិថី ព្រះសីហនុ មហាវិថី ព្រះមុន្នីវង្ស មហាវិថីកម្ពុជាក្រោម និងមហាវិថិនេរុហ៍ ..។ ដាច់ខាតមិនអនុញ្ញាតឲ្យយកចិញ្ជើមផ្លូវ ប្រកបអាជីវកម្ម បង្កឲ្យបាត់បង់សណ្ដាប់ធ្នាប់ បរិស្ថានអនាម័យ និងបង្កការកកស្ទះជាដើម។

ជាចុងក្រោយអាជ្ញាធរបានអប់រំដល់ម្ចាស់យានដ្ឋានដែលយកចិញ្ជើមផ្លូវសាធារណៈ មិនឲ្យបន្តធ្វើបែបនេះទៀតឡើយ ត្រូវរក្សារចិញ្ជើមផ្លូវសម្រាប់អ្នកថ្មើរជើង៕ អត្ថបទ៖ កុម្ភៈ