​ទីក្រុង Srinagar ជា​ក្រុង​របស់​រដ្ឋធានី​រដូវ​ក្តៅ Jammu របស់​ប្រទេស​ឥណ្ឌា និង​ជា​ដែនដី​សហព័ន្ធ​តំបន់ Kashmir ត្រូវបាន​រៀបចំ​លម្អរ​នៅ​ថ្ងៃ​ចន្ទ​នេះ ខណៈ​ទីក្រុង​នេះ​ត្រៀមខ្លួន​ធ្វើជា​ម្ចាស់ផ្ទះ​កិច្ចប្រជុំ​ក្រុមការងារ​ទស​ចរណ៍ G20​។ កិច្ចប្រជុំ​របស់​សមាជិក​ក្រុម​ប្រទេស G20 នៅ​ថ្ងៃទី​២២ ដល់​ថ្ងៃទី​២៤ ខែឧសភា គឺជា​ផ្នែក​មួយ​នៃ​កិច្ចប្រជុំ​ជា​បន្តបន្ទាប់ មុន​កិច្ចប្រជុំ​កំពូល​G20​ក្នុង​ទីក្រុង New Delhi នៅ​ខែកញ្ញា​។

​បដា ផ្ទាំង​ប្រកាស និង​គំនូរ ត្រូវបាន​បំពាក់​នៅក្នុង​ទីក្រុង​នេះ ខណៈ​សន្តិសុខ ក៏​ត្រូវបាន​រឹតបន្តឹង ដើម្បី​ទប់ស្កាត់​ឧបត្តិហេតុ​មិន​សមស្រប​ណាមួយ​កើតមានឡើង​។

​អ្នកចំរៀង​ម្នាក់ ឈ្មោះ Bilal Ahmad និយាយថា កិច្ចប្រជុំ​កំពូល​G 20 នឹង​ចាប់ផ្តើម​ពីថ្ងៃ​នេះ យើង​ស្វាគមន៍​កិច្ចប្រជុំ​ពី​បេះដូង​របស់​យើង ព្រោះ​វា​សម្រាប់​ការអភិវឌ្ឍន៍​តំបន់ Kashmir ។ ប្រភេទ​នៃ​ទម្រង់​សិល្បៈ នឹង​ជាត​ន្ត្រី ឬ​សកម្មភាព​ទេសចរណ៍ ដែល​អ្វីៗ​គ្រប់យ៉ាង​គឺ​សម្រាប់​ការអភិវឌ្ឍន៍​។

​ប្រទេស​ឥណ្ឌា ដែល​ទទួល​តួនាទី​ជា​ប្រធាន​កិច្ចប្រជុំ​ក្រុម​ប្រទេស G20 នៅ​ឆ្នាំនេះ បានរៀបចំ​កិច្ចប្រជុំ​ជា​បន្តបន្ទាប់​នៅ​ទូទាំងប្រទេស នៅមុន​កិច្ចប្រជុំ​កំពូល​នៅ​ទីក្រុង New Delhi នៅ​ខែកញ្ញា​។ ប្រទេស​ចិន កាលពី​សប្តាហ៍​កន្លងទៅ​នេះ បាន​និយាយថា ខ្លួន​បាន​ជំទាស់​ចំពោះ​កិច្ចប្រជុំ​ទេសចរណ៍ G20 នេះ ហើយ​នឹងមិន​ចូលរួម​នោះទេ​។ កាលពី​ឆ្នាំ​២០១៩ ប្រទេស​ឥណ្ឌា​បាន​បំបែក​រដ្ឋ Jammu ដែលមាន​ប្រជាជន​មូស្លីម​ភាគច្រើន និង​តំបន់​Kashmir ដើម្បី​បង្កើត​ដែនដី​សហព័ន្ធ​ចំនួន​២​នៃ​រដ្ឋ​Jammu តំបន់ Kashmir និង​តំបន់ Ladakh។​

​ផ្នែក​ធំ​មួយ​នៃ​តំបន់ Ladakh ស្ថិតនៅក្រោម​ការគ្រប់គ្រង​របស់​ចិន​។ ទំនាក់ទំនង​រវាង​ទីក្រុង New Delhi និង​ទីក្រុង​ប៉េកាំង​មាន​ភាព​តានតឹង ចាប់តាំងពី​ការប៉ះទង្គិច​យោធា ក្នុង​តំបន់ Ladakh ក្នុង​ឆ្នាំ​២០២០ ដែល​ពេលនោះ​ទាហាន​២៤​នាក់​បាន​ស្លាប់​៕