ភ្នំពេញ៖ បណ្ណមូលនិធិសមធម៌សុខាភិបាល ដែលក្រុមការងារសាលារាជធានីភ្នំពេញ សហការជាមួយក្រុមការងារគណៈកម្មការផ្សាររដ្ឋទាំង២៥ នៅរាជធានីភ្នំពេញ ក្នុងការចែកជូនពលរដ្ឋ ជាអាជីវករលក់ដូរមានកម្រិតជីវភាពនៅខ្វះខាតនោះ គឺនឹងត្រូវចែកជូនពួកគាត់បានអស់១០០ភាគរយ នៅថ្ងៃទី២៣ ខែឧសភា ឆ្នាំ២០២៣នេះ នេះបើតាមការបញ្ជាក់អោយដឹងពីក្រុមការងារចុះអនុវត្តការផ្តល់បណ្ណជូនពលរដ្ឋដោយផ្ទាល់ ។

ដំណើរការនៃការចុះផ្តល់បណ្ណមូលនិធិសមធម៌សុខាភិបាលនេះ បានធ្វើឡើងតាំងពីថ្ងៃ២០ ខែឧសភា ឆ្នាំ២០២៣មកម្លេះ ។

បណ្ណមូលនិធិសមធម៌សុខាភិបាលនេះ គឺចែកជូនក្រុមអាជីវករមានជីវភាពខ្វះខាត ក្នុងគោលដៅសម្រាប់ការប្រើប្រាស់លើការទៅពិនិត្យព្យាបាលជម្ងឺ ​និងថែទាំសុខភាព នៅ​តាមមន្ទីរពេទ្យបង្អែក ​ឬមន្ទីរពេទ្យរដ្ឋទាំងអស់ ​ដោយពុំគិតប្រាក់នោះឡើយ ។

ក្រុមអាជីវករ បានបង្ហាញអារម្មណ៍ និងទឹកចិត្តយល់ឃើញថា ការដែលរាជរដ្ឋាភិបាល តាម​រយៈអាជ្ញាធរ​រាជធានី ​និងគណៈកម្មការផ្សារ បានជួយគិតគូរយកចិត្តទុកដាក់ក្នុងការផ្តល់​ជូន​ពួកគាត់ទាំងអស់គ្នានូវបណ្ណមូលនិធិសមធម៌សុខាភិបាលនៅពេលនេះ គឺបានចូលរួម​សម្រួល​ដល់ការកាត់បន្ថយការចំណាយប្រាក់កាសរបស់ពលរដ្ឋទាំងអស់គ្នា​ ក្នុងការពិនិត្យ ថែទាំ និងព្យាបាលជម្ងឺជាដើម ។

អាជីវករ បន្តថា ពួកគាត់ពិតជាមានក្តីរំភើបរីករាយសប្បាយចិត្តជាខ្លាំងបំផុតចំពោះការដែល​ពួកគាត់​អាចមានឱកាសទទួលបានបណ្ណនេះ យកមកប្រើប្រាស់លើវិស័យសុខាភិបាល ព្រោះពួកគាត់​ជាអ្នកលក់ដូរតាម​កញ្ច្រែង ល្អី​ ដែលមានកម្រិតជីវភាពនៅខ្វះមុខក្រោយប៉ុណ្ណោះ មិនមាន​ប្រាក់កាសច្រើនគ្រប់គ្រាន់សម្រាប់ពិនិត្យព្យាបាលជម្ងឺឈឺស្កាត់ម្តងៗ​នោះទេ អញ្ចឹងហើយ​នៅពេលពួកគាត់​ទទួលបានបណ្ណនេះ គឺវាពិជាការប្រសើរបំផុតសម្រាប់ពួកគាត់គ្រប់ៗគ្នា ។

សូមបញ្ជាក់ថា បណ្ណមូលនិធិសមធម៌សុខាភិបាល ដែលនឹងត្រូវផ្តល់ជូនពលរដ្ឋជាអាជីវករលក់​ដូរនៅផ្សារទាំង២៥ ក្នុងរាជធានី ​ដែលមានកម្រិតជីវភាពនៅខ្វះខាត ​មានសរុបចំនួន ៤,៤១៤បណ្ណ ដែលនឹងត្រូវផ្តល់ជូនពួកគាត់ជាបន្តបន្ទាប់រហូតទាល់តែអស់គ្នានៅក្នុងថ្ងៃនេះតែម្តង ៕