ភ្នំពេញ៖ កងទ័ពជើងអាកាស នៃកងយោធពលខេមរភូមិន្ទ កំពុងបន្តពង្រឹងនូវផ្នែកចិត្តសាស្ត្រ​ដល់កងទ័ព ដើម្បីឆ្លើយតបទៅនឹងការវិវឌ្ឍកាន់តែរីកចម្រើន នៃបច្ចេកវិទ្យាសម័យទំនើប ក៏ដូចជាការផ្ទុះឡើងនូវព័ត៌មាន ក្លែងក្លាយពីគ្រប់ទិសទី ។

នៅក្នុងពិធីបើកវគ្គបំប៉នគ្រូបង្គោលអប់រំចិត្តសាស្ត្រ និងខ្សែរយៈជំនាញការិយាល័យទី៥ ប្រចាំ ឆមាសទី១ ឆ្នាំ២០២៣ នៅថ្ងៃទី២៣ ខែឧសភានេះឧត្តមសេនីយ៍ឯក សោម សាទុំ មេបញ្ជាការ​រងកងទ័ព ជើងអាកាស ​បានឱ្យដឹងថា ​កងទ័ពជើងអាកាស កំពុងមានស្មារតី​យកចិត្តទុកដាក់​ក្នុងភារកិច្ច យល់ច្បាស់ ពីសារសំខាន់ និងភាពចាំបាច់មិនអាចខ្វះបាន​ នៃការងារអប់រំនូវចិត្តសាស្ត្រ ដែលជាត្រីវិស័យ ​សម្រាប់កង ​កម្លាំងប្រដាប់អាវុធទាំងអស់ ជាពិសេសចំពោះកងយោធពល​ខេមរភូមិន្ទកម្ពុជា ។

ឧត្តមសេនីយ៍ឯក បានបន្តថា ការអប់រំចិត្តសាស្ត្រនេះ ​ជាកម្លាំងចលករមួយដ៏មានឥទ្ធិពល ​ជាអាវុធ ដ៏មុតស្រួចផ្ដល់នូវកម្លាំងចិត្ត ​កម្លាំងកាយ ​ដល់យោធិនគ្រប់រូប ​ឲ្យរឹតតែមានភាពខ្លាំងក្លារឹងមាំ ជាពិសេសជំរុញនូវគោលជំហរ ស្មារតី សតិអារម្មណ៍របស់យោធិនម្នាក់ៗ ​ឲ្យមានឆន្ទៈ មនសិការ​ស្នេហាជាតិមុតមាំ ​ឈានទៅអនុវត្តសម្រេចជោគជ័យនូវគ្រប់ភារកិច្ចធំៗ គោលនយោបាយរបស់​រាជរដ្ឋាភិបាល បទបញ្ជា ​របស់ក្រសួងការពារជាតិ​ អគ្គបញ្ជាការដ្ឋាន ​នៃកងយោធពលខេមរភូមិន្ទ ។

ឧត្តមសេនីយ៍ឯក សោម សាទុម បានបន្ថែមថា ​ទោះសិក្ខាកាមទាំងអស់ ​សុទ្ធសឹង​តែមានសមត្ថ ភាព ជំនាញច្បាស់លាស់ និងបទពិសោធន៍យូរឆ្នាំមកហើយ តែចាំបាច់ត្រូវប្រមូលផ្ដុំអារម្មណ៍ យកចិត្តទុក ​ដាក់ប្រឹងប្រែងរៀនសូត្រ ​និងឈ្វេងយល់ឲ្យស៊ីជម្រៅ ដើម្បីផ្សព្វផ្សាយដល់យោធិន​ក្នុង​អង្គភាពរបស់ខ្លួន ដើម្បីពង្រឹងស្មារតីសតិអារម្មណ៍ ​និងគោលជំហរ​នយោបាយចិត្តសាស្ត្រ ឲ្យកាន់​តែរឹងមាំបន្ថែមទៀតថ្វីត្បិតប្រទេសជាតិមានស្ថិរភាព ​និងសុខសន្តិភាពពេញលេញយ៉ាងណាក៏ដោយ ៕ អត្ថបទ៖ បាន សុខរិទ្ធិ