កណ្ដាល៖ ឯកឧត្តម វង្សី វិស្សុត រដ្ឋមន្រ្តីប្រតិភូអមនាយករដ្ឋមន្រ្តី, រដ្ឋលេខាធិការប្រចាំការ​នៃក្រសួង​សេដ្ឋកិច្ច និងហិរញ្ញវត្ថុ, និងជាអនុប្រធានឧត្តមក្រុមប្រឹក្សាសេដ្ឋកិច្ចជាតិ, ប្រធានក្រុមការងារ​រាជរដ្ឋាភិបាលចុះមូលដ្ឋានស្រុកមុខកំពូល ខេត្តកណ្តាល បានមានប្រសាសន៍ថា ភាពចាំបាច់ នៃការ​អភិវឌ្ឍមូលធនមនុស្ស ​ដំណើរការអភិវឌ្ឍគឺស្ថិតក្នុងរយៈពេល២០ឆ្នាំ តទៅមុខទៀត។

ឯកឧត្តម វង្សី វិស្សុត បានមានប្រសាសន៍បែបនេះ ខណៈអញ្ជើញជាអធិបតី​ក្នុងពិធីសម្ពោធដាក់​ឱ្យប្រើប្រាស់ជាផ្លូវការនូវអគារសិក្សា ​និងសមិទ្ធផលនានា​ ស្ថិតនៅក្នុងសាលាបឋមសិក្សា រកា កោង ស្ថិតក្នុងឃុំរកាកោងទី១ ​ស្រុកមុខ កំពូល ខេត្តកណ្តាល នាព្រឹកថ្ងៃទី២២ឧសភា។

អគារសិក្សា និងសមិទ្ធផលទាំងនេះ គឺជាអំណោយដ៏ថ្លៃថ្លារបស់សម្តេតេជោ ​ហ៊ុន សែន នាយករដ្ឋមន្រ្តី​កម្ពុជា និងសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន​ រួមមាន អគារសិក្សាចំនួន ០២ខ្នង មាន ១៧បន្ទប់ អគារទីចាត់ការ ០១ខ្នង ខ្លោងទ្វារ ដងទង់ជាតិ ​បង្គន់អនាម័យ ​កន្លែងលាងដៃ ផ្លូវបេតុងក្នុងទីធ្លាសាលា ០៤ខ្សែ ប្រវែង ១,១៨២ម៉ែត្រ​ និងរបង​ប្រវែង ១៥៨ម៉ែត្រ។

ឯកឧត្តម វង្សី វិស្សុត បាន​ពាំនាំនូវ​ប្រសាសន៍​ផ្តាំផ្ញើ​សាកសួរសុខទុក្ខពីសម្តេចទាំងពីរ ជូនចំពោះ​លោកគ្រូ-អ្នកគ្រូ សិស្សានុសិស្ស និងប្រជាពលរដ្ឋឃុំរកោកោងទី១ ​ស្រុកមុខកំពូលទាំងអស់។ ឯកឧត្តម ​មានប្រសាសន៍ ថា ក្រៅពី អគារសិក្សា ​និង​សមិទ្ធផលនានា ដែលត្រូវ​បានសម្ពោធដាក់​ឱ្យប្រើប្រាស់​ជាផ្លូវការនៅពេលនេះ, ឃុំ រកាកោងទី១ នៃស្រុកមុខកំពូល ក៏ទទួលបាននូវ​សមិទ្ធផល​ជាច្រើនផ្សេងទៀតផងដែរ ដូចជា៖ ផ្លូវកៅស៊ូ, ផ្លូវបេតុង, ផ្លូវក្រាលគ្រួសក្រហម, ស្ពាន, ប្រឡាយ, សាលារៀន, មន្ទីរពេទ្យ និងគម្រោង ការពារ ច្រាំងទន្លេជាដើម​ ដែល​ឆ្លុះបញ្ចាំង​ឱ្យឃើញតាមរយៈ ស្នាមញញឹម, របស់របរនិង​ មធ្យោបាយប្រើប្រាស់, ការ​ស្លៀកពាក់ និងការហូបចុកជាដើម ពោលគឺ មិនមែនកាន់តែក្រទៅៗ ដូច​មជ្ឈដ្ឋាន​អគតិផ្កាប់មុខមួយចំនួនចេះតែលើកឡើង​ដោយឥត​អៀនខ្មាស​នោះទេ។

ឯកឧត្តម វង្សី វិស្សុត ក៏បានលើកឡើងផងដែរថា ​អំពីភាពចាំបាច់ ​នៃការអភិវឌ្ឍមូលធនមនុស្ស នៅដំណើរការអភិវឌ្ឍកម្ពុជានៅក្នុងរយៈពេល ២០ឆ្នាំ តទៅមុខទៀត។ ​ឯកឧត្តម បានបន្តថា ការអភិវឌ្ឍមូល​ ធនមនុស្ស នេះ មិនសំដៅតែទៅលើការអប់រំ, ចំណេះដឹង និងជំនាញប៉ុណ្ណោះទេ តែ​ក៏ត្រូវផ្តោតផងដែរ ទៅលើផ្នែក គុណតម្លៃ, សីលធម៌, គុណធម៌, វិន័យ,​ ការបណ្តុះឆន្ទៈសេ្នហាជាតិ ស្រលាញ់យុត្តិធម៌​ និងប្រជាជនជាដើម៕ដោយ៖ មុត សុទ្ធ