ភ្នំពេញ៖ មនី្ទរពេទ្យកុមារជាតិ នៃក្រសួងសុខាភិបាល គ្រោងសាងសង់អគារព្យាបាលជំងឺថ្មីបន្ថែមទៀត ដែលមានកម្ពស់៥ជាន់ តម្លៃ១៦លានដុល្លារសហរដ្ឋអាមេរិក ក្រោមជំនួយរបស់រដ្ឋាភិបាល និងប្រជាជន នៃសាធារណរដ្ឋកូរ៉េ។

ឯកឧត្តម សាស្រ្តាចារ្យ ញឹប អង្គាបុស្ស នាយកមនី្ទរពេទ្យកុមារជាតិ​ តាមរយៈBTV ព័ត៌មាន នាថ្ងៃនេះថា ​អគារមន្ទីរពេទ្យថ្មីកម្ពស់៥ជាន់ ចំណាយថវិកាក្នុងការសាងសង់ចំនួន១៦លាន​ដុល្លារ​សហរដ្ឋអាមេរិក ឋិតក្នុងបរិវេណមន្ទីរពេទ្យកុមារជាតិ ​ជាជំនួយរបស់រដ្ឋាភិបាល ​និងប្រជាជន នៃសាធារណរដ្ឋកូរ៉េ ​គ្រោងនឹងសាងសង់នៅពាក់កណ្តាលឆ្នាំ២០២៤ ខាងមុខនេះ ដើម្បីជួយ​សម្រួលដល់ការពិនិត្យ ព្យាបាលជំងឺជូនដល់កុមារ។

ឯកឧត្តម សាស្ត្រាចារ្យ ញឹប អង្គាបុស្ស បានបញ្ជាក់ទៀតថា ​អគារព្យាបាលជំងឺថ្មីនេះ គឺជាអគារ​មន្ទីរពេទ្យទី២ហើយ ដែលរដ្ឋាភិបាល និងប្រជាជន ​នៃសាធារណរដ្ឋកូរ៉េ ​បានផ្តល់ជំនួយ ក្នុងសាងសង់ដ​ល់មន្ទីរពេទ្យកុមារជាតិ ​ខណៈអគារទី១ ​មានកម្ពស់៣ជាន់ ដែលបានសាង​សង់​នៅឆ្នាំ២០០៧ មានឈ្មោះថា អគារមិត្តភាពកម្ពុជា-កូរ៉េ បានដាក់ដំណើរការនៅឆ្នាំ២០០៩។

អគារថ្មីនេះ អាចដាក់គ្រែបានចំនួន១៦៩គ្រែ ​និងមានកន្លែងសម្រាប់បណ្តុះបណ្តាល ការ​អនុវត្តន៍ផ្ទាល់ ដល់ក្រុមការងារគ្រូពេទ្យផ្នែកជំនាញកុមារ ​មកពីតាមបណ្តារាជធានី-ខេត្ត និង​មានផ្នែកពិគ្រោះជំងឺក្រៅតាមឯកទេសនីមួយៗ ​មានអាហារដ្ឋាន​ កន្លែងក្មេងលេង និងមាន​បង្កើតសេវាថ្មីៗសម្រាប់កុមារដូចជា ជំងឺត្រចៀក ​ច្រមុះបំពង់ក ភ្នែក តម្រង់នោម ក្រពេញក្នុង ម៉ាស៊ីនលាងឈាមផ្នែកកុមារ ​ជំងឺមហារីកឈាម សួត ក្រពះពោះវៀន ម៉ាស៊ីនថតឆ្លុះក្រពះទងសួត និងជំងឺ អូទីហ្សឹម(Autism)ជាដើម៕អត្ថបទ រដ្ឋា