លោកប្រធានាធិបតី Joe Biden និង ប្រធានសភា លោក Kevin McCarthy មិនអាចសម្រេច​បានកិច្ច​ព្រមព្រៀងទេកាលពីថ្ងៃចន្ទ លើមធ្យោបាយដំឡើងកម្រិតបំណុលរបស់រដ្ឋាភិបាលសហរដ្ឋអាមេរិក​លើចំនួន៣១,៤សែនកោដិដុល្លារ ត្រឹមតែរយៈពេល១០ថ្ងៃមុនពេលអាចខកខានការសងបំណុល​ដែលអាចប៉ះពាល់ដល់សេដ្ឋកិច្ចសហរដ្ឋអាមេរិក ប៉ុន្តែបានប្ដេជ្ញាបន្តការពិភាក្សាតទៅទៀត។

ប្រធានាធិបតីមកពីគណបក្សប្រជាធិបតេយ្យ និងសមាជិកសភាជាន់ខ្ពស់មកពីគណបក្ស​សាធារណរដ្ឋ បានព្យាមសម្រេចឲ្យបានកិច្ចព្រមព្រៀងមួយ ខណៈលោក McCarthy ដាក់សម្ពាធ​លើសេតវិមាន​ដើម្បីឲ្យយល់ព្រមកាត់បន្ថយការចំណាយ ​និងកញ្ចប់ថវិកាសហព័ន្ធដែលលោក Bidenចាត់ទុកថា ជាចំនួនដ៏ច្រើន ហើយលោកប្រធានាធិបតីជំរុញ​ឲ្យមានការដំឡើងពន្ធថ្មី​ដែលខាង​គណបក្សសាធារណរដ្ឋបានច្រានចោល។

លោកBiden បាននិយាយនៅក្នុងសេចក្ដីថ្លែងការណ៍មួយបន្ទាប់ពីជំនួបដែលលោកបាន​ហៅថា​ប្រកបដោយផ្លែផ្កាថា យើងបានបញ្ជាក់ជាថ្មីទៀតថា ការខកខានសងបំណុលគឺពុំបានលើកមកដាក់​លើតុពិភាក្សាទេហើយផ្លូវតែមួយគត់ត្រូវបន្តទៅមុខគឺភាពជឿជាក់ឈានឆ្ពោះទៅរកកិច្ចព្រមព្រៀងទ្វេបក្ស ។

លោក McCarthy បានប្រាប់ក្រុមអ្នកសារព័ត៌មានបន្ទាប់ពីការពិភាក្សារយៈពេលមួយម៉ោង​ជាមួយ​លោកBidenថា ក្រុមអ្នកចរចា នឹងជួបជុំគ្នា ធ្វើការជាមួយគ្នា រហូតដល់យប់ ដើម្បីព្យាយាមស្វែងរក​ចំណុចរួម។

លោកMcCarthy បាននិយាយថា ខ្ញុំមានអារម្មណ៍ថា យើងទទួលបានការពិភាក្សាប្រកប​ដោយ​ផ្លែផ្កា ។ យើងពុំមានកិច្ចព្រមព្រៀងនៅឡើយទេ ។ខ្ញុំជឿថា​យើងនៅតែអាចដើរទៅដល់កិច្ច​ព្រមព្រៀង​បាន៕