ឧត្ដរមានជ័យ៖ ឯកឧត្ដម ប៉ែន កុសល្យ អភិបាលខេត្តឧត្ដរមានជ័យ នៅថ្ងៃទី២៣ ខែឧសភានេះ បានអញ្ជើញបើកការដា្ឋនជួសជុលផ្លូវក្រាលគ្រួសក្រហមប្រវែង ២០,៧១១ ម៉ែត្រ នៅឃុំបេង ស្រុកបន្ទាយអំពិល ខេត្តឧត្តរមានជ័យ ។

ក្នុងនោះក៏មានការអញ្ជើញចូលរួមពីសំណាក់ ឯកឧត្តម លោកជំទាវ លោក លោកស្រីអភិបាលរងខេត្ត ប្រធានមន្ទីរ អង្គភាពជុំវិញខេត្ត ព្រមទាំងបងប្អូនប្រជាពលរដ្ឋសរុបប្រមាណជាង៤០០ នាក់ផងដែរ។

ក្នុងឱកាសនោះ ឯកឧត្ដមអភិបាលខេត្ត មានប្រសាសន៍លើកឡើងថា នាពេលដ៏ឆាប់ខាងមុខ ក្រោយការបើកការដ្ឋានជួសជុលនាពេលនេះ សមិទ្ធផលផ្លូវ ក្រាលគ្រួសក្រហមចំនួន ៤ខ្សែ​ប្រវែងសរុប ២០,៧១១ ម៉ែត្រនឹងទទួលបានភាពល្អប្រសើរ ឡើងវិញ ដោយប្រើប្រាស់ថវិកា​សប្បុរសជនដែលជាក្រុមការងារគណបក្សប្រជាជនចុះជួយ ឃុំបេងផ្ទាល់ ដែលផ្លូវនេះ​មានសារៈសំខាន់បម្រើផលប្រយោជន៍ដល់ប្រជាពលរដ្ឋចំនួន ០៧ភូមិ នៃឃុំបេង ដើម្បីបង្កភាពងាយស្រួលក្នុងការធ្វើដំណើរ ក៏ដូចជាដឹកកសិផល ផលិត ផលយកទៅលក់នៅតាមទីផ្សារ រួមចំណែកលើកកម្ពស់ជីវភាព និងកាត់បន្ថយភាពក្រីក របស់បងប្អូន។

ឯកឧត្ដម បានបន្តថា អង្គពិធីនេះបានប្រព្រឹត្តទៅទន្ទឹមពេលដែលបងប្អូនយើងកំពុងមានក្តី សប្បាយរីករាយចំពោះការរីកចម្រើន និងការកើនឡើងទិន្នផលស្រែ ចម្ការនាឆ្នាំនេះ រួមនឹង ដំណាំរួមផ្សំ ដំណាំកសិឧស្សាហកម្ម និងដំណាំឈើហូបផ្លែក៏មានការកើនឡើងជាងឆ្នាំ កន្លងទៅផងដែរ ផលិតផលកសិផលនានាត្រូវបានឈ្មួញកណ្ដាលមកទិញដល់កន្លែងតែម្ដង ដែលបញ្ហានេះបង្កលក្ខណៈងាយស្រួលឲ្យកសិកររបស់យើងមិនលំបាករកទីផ្សារ និងកាត់បន្ថយអត្រាចំណាកស្រុកទៅរកការងារធ្វើនៅក្រៅប្រទេសរបស់បងប្អូនប្រជាពលរដ្ឋ។ បច្ចុប្បន្ននេះប្រជាជនខេត្តឧត្តរមានជ័យយើងមានភាព ងាយស្រួលឆ្ងាយមហាសែនឆ្ងាយ​បើប្រៀបធៀបទៅនឹងប៉ុន្មានឆ្នាំមុនបន្ទាប់ពី សម្តេចតេជោ បានផ្ដល់ហេដ្ឋារចនាសម្ព័ន្ធផ្លូវថ្នល់ ស្ពានខ្វែងខ្វាត់​តភ្ជាប់ពីទីរួមខេត្តទៅកាន់តំបន់ព្រំដែន និងបានភ្ជាប់ទៅបណ្តាខេត្តផ្សេងៗទៀត​ដូចជាសៀមរាប បន្ទាយមានជ័យ និងព្រះវិហារ ជាដើម ដែលយើងទាំងអស់មិនដែល​នឹងស្មានថា​ នឹង​ទទួលបាននូវសមិទ្ធផលទាំងនេះលឿន និងឆាប់រហ័សបែបនេះ។

ឆ្លៀតក្នុងឱកាសនោះដែរ ឯកឧត្ដមអភិបាលខេត្ត សូមអរគុណសន្តិភាព និងសូមអរគុណ សម្តេចតេជោ ​ដែលបានដឹកនាំកម្ពុជាឲ្យមានសន្តិភាព ​ហើយប្តេជ្ញារួមគ្នារក្សាការពារសន្តិភាពនេះ ឱ្យបានជាដាច់ខាត ពិសេសប្ដេជ្ញាចិត្តគាំទ្រ និងអនុវត្តតាមគោលនយោបាយរបស់រាជរដ្ឋាភិបាល​កម្ពុជា ដែលដឹកនាំដោយសម្តេចអគ្គមហាសេនាបតីតេជោ ហ៊ុន សែន ជា​អគ្គ​មគ្គុទ្ទេសក៍​ដ៏ឆ្នើម​បំផុតដែលបាននាំមកជូនជាតិមាតុភូមិនូវសន្តិសុខ ស្ថេរភាព និងការអភិវឌ្ឍ សេដ្ឋកិច្ច-សង្គមនាពេលបច្ចុប្បន្ន។

ឯកឧត្ដម ប៉ែន កុសល្យ ក៏បានអំពាវនាវដល់បងប្អូនប្រជាពលរដ្ឋទៅចូលរួម ”បោះឆ្នោត” នាថ្ងៃទី ២៣ ខែកក្កដា ខាងមុខឲ្យបានទាំងអស់គ្នា ​និងបោះឆ្នោតជូនគណបក្សណាដែលបងប្អូនអាច​ផ្ញើក្តីសង្ឃឹមជឿជាក់ ដើម្បីសន្តិភាព សាមគ្គីភាព និងការអភិវឌ្ឍជាតិយើង។

ក្នុងឱកាសនេះ ក៏បាននាំយកមកជាមួយនូវអំណោយដ៏ថ្លៃថ្លារបស់សម្តេចតេជោ ​នាយករដ្ឋមន្ត្រី មកជូនបងប្អូនប្រជាពលរដ្ឋចំនួន ៤០០នាក់ ក្នុងម្នាក់ៗទទួលបាន សារុង ១ និងថវិកា ១ ម៉ឺនរៀលផងដែរ៕