ក្រុមហ៊ុន Meta ត្រូវបាន​ពិន័យ​ទឹកប្រាក់​ដ៏​ច្រើន​ចំនួន ១,២​ពាន់​លាន​អឺរ៉ូ (១,៣​ពាន់​លាន​ដុល្លារ​) ដោយ​ក្រុម​និយតករ​ការពារ​ឯន​ភាព​របស់​សហភាព​អឺរ៉ុប ជុំវិញ​ការផ្ទេរ​ទិន្នន័យ​អ្នកប្រើប្រាស់​របស់​តំបន់​អឺរ៉ុប ទៅកាន់​សហរដ្ឋអាមេរិក​។​

​ការសម្រេច​នេះ​ភ្ជាប់​ទៅ​ករណី ដែល​នាំមក​ប្ដឹង​ដោយ​អ្នកធ្វើ​យុទ្ធនាការ​ឯកជន​ភាព​ជនជាតិ​អូទ្រីស លោក Max Schrems ដែល​បាន​តវ៉ា​ថា ក្របខ័ណ្ឌ​សម្រាប់​ការផ្ទេរ​ទិន្នន័យ​ពលរដ្ឋ​សហភាព​អឺរ៉ុប​ទៅ​សហរដ្ឋអាមេរិក​មិន បានការ​ពារ​ជនជាតិ​អឺរ៉ុប​ពី​ការ​តាមឃ្លាំមើល​របស់​សហរ​ដ្ឋ​អាមេរិក​ទេ​។​

​របៀប​ជាច្រើន​ដើម្បី​ផ្ទេរ​ទិន្នន័យ​ផ្ទាល់ខ្លួន​ដោយ​ស្របច្បាប់ រវាង​សហរដ្ឋអាមេរិក និង​សហភាព​អឺរ៉ុប ត្រូវបាន​ជំទាស់​តវ៉ា​។ ការអះអាង​ថ្មី​ដូចនេះ​ចុងក្រោយ​បំផុត ស្ថាប័ន ការពារ​ឯកជន​ភាព​(Privacy Shield)​ត្រូវបាន​កាត់ក្ដី​ដោយ​តុលាការ​យុត្តិធម៌​អឺរ៉ុប ដែលជា​តុលាការ​កំពូល​របស់​ស​ហ​ភាព​អឺរ៉ុប (EU) នៅ​ឆ្នាំ​២០២០​។​

​គណៈកម្មាការ​ការពារ​ទិន្នន័យ​អៀរ​ឡង់ ដែល​គ្រប់គ្រង​ប្រតិបត្តិការ​របស់​ក្រុមហ៊ុន Meta នៅ​សហភាព​អឺរ៉ុប បាន​ចោទប្រកាន់ថា ក្រុមហ៊ុន​នេះ​បាន​រំលោភ​លើ​បទ​ប្បញ្ញត្តិ​ការពារ​ទិន្នន័យ​ទូទៅ ឬ GDPR របស់​ប្លុក នៅពេលដែល​ក្រុមហ៊ុន​បន្ត​បញ្ជូន​ទិន្នន័យ​ផ្ទាល់ខ្លួន​របស់​ពលរដ្ឋ​តំបន់​អឺរ៉ុប​ទៅ​សហរដ្ឋអាមេរិក ទោះបី​ជាមាន​សេចក្តីសម្រេច​របស់​តុលាការ​អឺរ៉ុប​ឆ្នាំ​២០២០ ក៏ដោយ​។​

​បទ​ប្បញ្ញត្តិ​ការពារ​ទិន្នន័យ​ទូទៅ ឬ GDPR គឺជា​ច្បាប់​ការពារ​ទិន្នន័យ​សំខាន់ៗ​របស់​សហភាព​អឺរ៉ុប ដែល​គ្រប់គ្រង​ក្រុមហ៊ុន​សកម្ម ក្នុង​ប្លុក​។ ច្បាប់​នេះ​ចូល​ជា​ធរមាន​ក្នុង​ឆ្នាំ​២០១៨​។​

​ការពិន័យ​ជា​ប្រាក់​ចំនួន​១,២​ពាន់​លាន​អឺរ៉ូ (១,៣​ពាន់​លាន​ដុល្លារ​) សម្រាប់​ក្រុមហ៊ុន Meta គឺជា​ការពិន័យ​ខ្ពស់បំផុត​មិន​ធ្លាប់មាន ចំពោះ​ក្រុមហ៊ុន​ដែល​បំពាន​លើ​បទ​ប្បញ្ញត្តិ​ការពារ​ទិន្នន័យ​ទូទៅ ឬ GDPR ។ ការផាកពិន័យ​ដ៏​ខ្ពស់បំផុត​ពីមុន គឺ​ការគិត​ជា​ប្រាក់​ចំនួន ៧៤៦​លាន​អឺរ៉ូ សម្រាប់​ក្រុមហ៊ុន​ពាណិជ្ជកម្ម​អេឡិចត្រូនិក​ខ្នាត​យក្ស Amazon​ក្នុង​ឆ្នាំ​២០២១​។​

​តែ​យ៉ាងណាក្ដី ក្រុមហ៊ុន Meta បាន​ឲ្យ​ដឹងថា ខ្លួន​គ្រោង​នឹងធ្វើ​ការប្តឹង​ឧទ្ធរណ៍​លើ​ការសម្រេច និង​ការផាកពិន័យ​នេះ​៕​