ភ្នំពេញ៖ ​សម្ដេច​តេ​ជោ ហ៊ុន សែន នាយករដ្ឋមន្ដ្រី​កម្ពុជា បាន​សំដែង​ការគាំទ្រ​យ៉ាង​ពេញទំហឹង​ដល់​ក្រុមហ៊ុន DMG MORI និង​បាន​ស្នើឱ្យ​ក្រុមហ៊ុន​DMG MORI និង​រដ្ឋាភិបាល​ជប៉ុន​បន្ត​ជួយ​កម្ពុជា​បន្ថែមទៀត ដើម្បី ធ្វើ​ឲ្យ​កម្ពុជា​អាចឈាន​ហក់​ទៅមុខ លើ​វិស័យ​ឌីជីថល​។​

​សម្ដេច​តេ​ជោ ហ៊ុន សែន បានបង្ហាញ​ការគាំទ្រ​និង​ស្នើឡើង​បែបនេះ​ក្នុងពេល​សម្តេច​បានអនុញ្ញាត​ឱ្យ​លោក MORI MASAHIKO ប្រធាន​ក្រុមហ៊ុន DMG MORI ចូលជួប​សម្ដែង​ការគួរសម និង​ពិភាក្សា​ការងារ​។​

​ក្នុងឱកាស​អនុញ្ញាតឱ្យ ចូលជួប​នៅ​វិមាន​សន្តិភាព​នា​ល្ងាច​ថ្ងៃទី​២៣​ឧសភា​នេះ លោក MORI MASAHIKO បាន គោរព​ជម្រាបជូន​សម្ដេច​តេ​ជោ អំពី​មជ្ឈមណ្ឌល​ពាណិជ្ជកម្ម​ឌីជីថល កម្ពុជា​ជប៉ុន ហើយ​ដែល មជ្ឈមណ្ឌល​នេះ​មាន​គោលបំណង​បី .​ទី​១ ចូលរួម​ជំរុញ​ការធ្វើ​ឌីជីថល​ពាណិជ្ជកម្ម ឧស្សាហកម្ម​នៅ​កម្ពុជា .​ទី​២ ចូលរួម​ជំរុញ​អភិវឌ្ឍន៍​ធនធានមនុស្ស​លើ​វិស័យ ឌីជីថល​ឧស្សាហកម្ម​និង ទី​៣ ជំរុញ​កិច្ចសហប្រតិបត្តិការ រវាង​ឧស្សាហកម្ម​ដែល​ប្រើប្រាស់​ប្រព័ន្ធ​ឌីជីថល​។

​លោក ម៉ូ​រី បាន​គោរព​ជម្រាបជូន​សម្ដេច​តេ​ជោ​បន្ថែមថា មជ្ឈមណ្ឌល ផលិតកម្ម ឌីជីថល​ឧស្សាហ​កម្មនេះ ជា​គម្រោង​ដែលមាន​កិច្ចសហប្រតិបត្តិការ​រ​វាង រដ្ឋាភិបាល​ជប៉ុន សាកលវិទ្យាល័យ​ភូមិន្ទ​ភ្នំពេញ​និង ក្រុមហ៊ុន DMG MORI ហើយ​ម៉ាស៊ីន​ដែល​យកមក​កម្ពុជា នៅពេលនេះ គឺជា​ម៉ាស៊ីន​ដែល​ទំនើប បំផុត​និង​ចាំបាច់​បំផុត​សម្រាប់​ឧស្សាហកម្ម​នា​សម័យ​ឌីជីថល​។​

​លោក បាន​បន្ថែមថា​ ក្រុមហ៊ុន​DMG MORI នឹង​នៅ​បន្ត​ហ្វឹកហាត់​ដល់​កម្ពុជា​ក្នុងការ​ប្រើប្រាស់​ម៉ាស៊ីន និង​បង្រៀន​ដល់​និស្សិត​កម្ពុជា ហើយ​ឆ្លៀត​ក្នុងឱកាស​នោះដែរ លោក​ម៉ូ​រី​ ក៏បាន​គោរព​ស្នើសុំ​សម្ដេច​តេ​ជោ មេត្តាជួយ​គាំទ្រ​លើ​គម្រោង​នេះ​។​

​ជាការ​ឆ្លើយតប សម្ដេច​តេ​ជោ​បាន​សម្ដែង នូវ​ការស្វាគមន៍​និង​ថ្លែងអំណរគុណ និង​បាន​ជម្រាបជូន​លោក​ម៉ូ​រី ថា កម្ពុជា​កំពុង​ជំរុញ ផ្នែក​ឌីជីថល ។ កម្ពុ​ជាមាន​គោលដៅ​ពីរ​សម្រាប់​វិស័យ​ឧស្សាហកម្ម ទី​១ គឺ​ជំរុញ​ការវិនិយោគ លើ​វិស័យ​ឧស្សាហកម្ម បម្រើ​ឲ្យ​ការកែច្នៃ​វត្ថុធាតុដើម​ដែលមាន​ស្រាប់​សម្រាប់​ការនាំចេញ​។ ទី​២ ទាក់ទាញ​បច្ចេកវិទ្យា​ថ្មី​មក​ផលិត​នៅ​កម្ពុជា ហើយ​ចំពោះ​សំណើ របស់លោក ​ម៉ូ​រី សុំ​ការគាំទ្រ​អំពី​សម្ដេច​តេ​ជោ​នោះ សម្ដេច​បាន​មានប្រសាសន៍ថា សម្ដេច​មិន​ត្រឹមតែ​គាំទ្រ​ទេ​គឺ​ស្នើសុំ​ឲ្យ​ក្រុមហ៊ុន​ម៉ូ​រី និង​រដ្ឋាភិបាល​ជប៉ុន​បន្ត​ជួយ​កម្ពុជា​បន្ថែមទៀត​ដើម្បី ធ្វើ​ឲ្យ​កម្ពុជា​អាចឈាន​ហក់​ទៅមុខ លើ​វិស័យ​ឌីជីថល​។​

​គួរ​បញ្ជាក់​ថា សាកលវិទ្យាល័យ​ភូមិន្ទ​ភ្នំពេញ (RUPP) ដែលមាន​កិច្ចសហការ​ជាមួយ​ក្រុមហ៊ុន​នេះ​ជា​សាកលវិទ្យាល័យ​តែមួយគត់​នៅ​អាស៊ីអាគ្នេយ៍ (​អាស៊ាន​) ដែល​ទទួលបាន​ម៉ាស៊ីន​​សម្រាប់​ផលិត​ម៉ា​ស៉ី​ន ពី​ក្រុមហ៊ុន DMG MORI ដែល​ជា​ក្រុមហ៊ុន​លំដាប់​លេខ​មួយ​នៅលើ​ពិភពលោក ខាង​ផលិត​គ្រឿង​ម៉ា​ស៉ី​ន របស់​ប្រទេស​អាល្លឺម៉ង់ និង​ជប៉ុន​។​ ម៉ាស៊ីន​ផលិត​ម៉ាស៊ីន​​ដែលមាន​តម្លៃ​យ៉ាង​ថ្លៃ របស់ DMG MORI មកដល់​កម្ពុជា នៅ​ខែ​វិច្ឆិកា ឆ្នាំ​២០២២ ដែល​ម៉ាស៊ីន​​ដ៏​អស្ចារ្យ​នេះ​ បានដាក់​នៅ​សាកលវិទ្យាល័យ​ភូមិន្ទ​ភ្នំពេញ ដើម្បី​ឲ្យ​និស្សិត​នៃ​មហាវិទ្យាល័យ​វិស្វកម្ម​អនុវត្ត​ផ្ទាល់ ក្រោយពី​សិក្សា​ទ្រឹស្តីតាំងពី​ឆ្នាំ​២០១៩៕

​​