ក្រសួងការបរទេសសហរដ្ឋអាមេរិក បាននិយាយកាលពីថ្ងៃចន្ទថា ទាហានស៊ីឈ្នូលរុស្ស៊ី Wagnerព្យាយាម បិទបាំងកិច្ចខិតខំរបស់ពួកគេ ក្នុងការទទួល​បាន​គ្រឿង​យុទ្ធោបករណ៍​សម្រាប់​ប្រើប្រាស់នៅអ៊ុយក្រែន ហើយទីក្រុង វ៉ាស៊ីងតោន ទទួលបានដំណឹងថា ទាហាន Wagner ព្យាយាម​ដឹកជញ្ជូនអាវុធជួយធ្វើសង្រ្គាមរុស្ស៊ីទាំងនេះ ឆ្លងកាត់តាមប្រទេសម៉ាលី។ 

លោក Matthew Miller គឺជាអ្នកនាំពាក្យក្រសួងការបរទេសសហរដ្ឋអាមេរិក និយាយថា មានការចង្អុរបង្ហាញ ផ្លូវថា ទាហានស៊ីឈ្នូល Wagnerបានព្យាយាម​ទិញប្រព័ន្ធ​យោធាពី​ក្រុមអ្នក​ផ្គត់ផ្គង់​បរទេស និងដឹកជញ្ជូនអាវុធទាំងនេះឆ្លងកាត់តាមប្រទេសម៉ាលី ដែលជាប្រទេសទី៣។ 

លោក​បន្តថា ពួកយើងនៅពុំទាន់មើលឃើញការចង្អុរបង្ហាញណាមួយថា ការទិញអាវុធទាំងអស់នេះ ត្រូវបានបញ្ចប់ឬត្រូវបានប្រតិបត្តិនោះទេ ប៉ុន្តែពួកយើង កំពុងតានដាន​ស្ថានភាព​យ៉ាងដិត​​ដល់បំផុត ៕