​កាលពី​ថ្ងៃ​ចន្ទ​ម្សិលមិញ លោក Volker Perthes គឺជា​ប្រ​សិត​ពិសេស​អង្គការសហប្រជាជាតិ​(UN)​ប្រចាំ​នៅ​ប្រទេស​ស៊ូដង់ បាន​ព្រមាន​ពី​ការយក​កំណើន​ជាតិ​សាសន៍​ធ្វើជា​ប្រភព​នៃ​ជម្លោះ​យោធា​ដែល​បាន​ផ្ទុះឡើង​នៅក្នុង​ប្រទេសមួយ​នេះ កាលពី​ខែ​មុន ហើយ​និង​ផលប៉ះពាល់​ខ្លាំង​ដល់​ប្រទេសជិតខាង​នៅក្នុង​តំបន់ ។

​លោក Perthes ដែល​ដឹកនាំ​ផងដែរ​នូវ​បេសកកម្ម​ជំនួយ​អន្តរកាល​រួមបញ្ចូល​គ្នា​របស់ UN នៅក្នុង​ប្រទេស​ស៊ូដង់ និយាយប្រាប់​ក្រុមប្រឹក្សាសន្តិសុខ UN​ថា ការការពារ​ការកើនឡើង​ជម្លោះជាតិសាសន៍ ស្ថិតនៅ​ក្នុងចំណោម​អាទិភាព​ចម្បង​របស់ UN ។

​កាលពី​ថ្ងៃ​ចន្ទ​ម្សិលមិញ រយៈពេល​ប៉ុន្មាន​ម៉ោង​មុនពេល​បទ​ឈប់​បាញ់​រយៈពេល ១​សប្តាហ៍​ចូល​ជា​ធរមាន ដើម្បី​អនុញ្ញាត​ឲ្យ​មាន​ការចែក​ជំនួយ កងកម្លាំង​ស៊ូដង់ បាន​បើក​ការវាយប្រហារ​តាម​ច្រក​អាកាស​នៅក្នុង​រដ្ឋធានី Khartoum ។

​ក្រុម​សាក្សី និយាយថា កងទ័ព​ស៊ូដង់ បាន​បើក​ការវាយប្រហារ​តាម​ច្រក​អាកាស​ផងដែរ​កាលពី​ល្ងាច​ថ្ងៃអាទិត្យ ដោយមាន​គោលដៅ​លើ​រថយន្ត​មកពី​អង្គភាព​ចល័ត​របស់​កងកម្លាំង​គាំទ្រ​រហ័ស​(RSF)​ដែល​បាន​ប្រតិបត្តិការ​នៅ​ទូទាំង​តំបន់​រស់នៅ​របស់​អ្នកស្រុក​ក្នុង​រដ្ឋធានី Khartoum ចាប់តាំងពី​ជម្លោះ​រវាង​ភាគី​យោធា​ទាំង ២ បាន​ផ្ទុះឡើង​កាលពី​ថ្ងៃទី ១៥ ខែមេសា​កន្លងទៅ ។

​ភាគី​បង្ក​សង្គ្រាម​ទាំង ២ បាន​និយាយថា ពួកគេ​នឹង​គោរព​តាម​បទ​ឈប់​បាញ់ ដែល​បានចាប់ផ្តើម​ចូល​ជា​ធរមាន​នៅវេលា​ម៉ោង ៩និង៤៥​នាទី​យប់​ថ្ងៃ​ចន្ទ ម៉ោង​ក្នុងស្រុក៕​