ភ្នំពេញ ៖ កាលពីថ្មីៗនេះ ឯកឧត្តម នាយឧត្តមសេនីយ៍ ឥត សារ៉ាត់ អគ្គមេបញ្ជាការរង នាយសេនាធិការចម្រុះ​នៃកងយោធពលខេមរភូមិន្ទ និងជាប្រធានក្រុមការងាររៀបចំប្រារព្ធពិធីជំនួបមិត្តភាពការពារជាតិថ្នាក់រដ្ឋមន្ត្រី បានចុះពិនិត្យទីតាំងត្រៀមរៀបចំពិធីនៅតំបន់ព្រំដែនត្រីកោណមរកត (កន្ទុយនាគ) ដែលជាបង្គោលព្រំដែនគោកទី១ នៃចំណុចប្រសព្វគ្នា របស់ប្រទេសទាំងបី កម្ពុជា-វៀតណាម- និងកម្ពុជា-ឡាវ និងទីតាំងមួយចំនួនទៀត ដែលរួមមាន ទីតាំងចុះយន្តហោះ ទីតាំងធ្វើសកម្មភាពផ្នែកសុខាភិបាលយោធា ជួយពិនិត្យ ព្យាបាលសុខភាពជូនប្រជាពលរដ្ឋ នៅឃុំងុកហ៊ួយ ខេត្តកនទុំ វៀតណាម ទីតាំងសម្រាប់ថ្នាក់ដឹកនាំប្រទេសទាំងបី ចែកអំណោយ នៅក្នុងភូមិសាស្រ្ត​មួយចំនួនរបស់ខេត្ត កន ទុំ សាធារណរដ្ឋសង្គមនិយមវៀតណាម និងនៅស្រុកអូយ៉ាដាវ ខេត្តរតន:គីរី ។

ក្រោយការចុះពិនិត្យគ្រប់ទីតាំងសម្រាបើការរៀបចំរបស់ភាគីវៀតណាម ភាគីកម្ពុជាបានឯកភាពលើគ្រប់ទីតាំង ដែលបានរៀបចំ តាមការគ្រោងទុក របស់ក្រុមការងារភាគីទាំងបីប្រទេស កម្ពុជា-វៀតណាម-ឡាវ ។

នាយឧត្តមសេនីយ៍ ឥត សារ៉ាត់ បានបញ្ជាក់ថា ការជួបប្រជុំពិភាក្សាលំអិតស្ដីពីការប្រុងប្រៀបរៀបចំជំនួបប្រាស្រ័យ​មិត្តភាពការពារជាតិ ថ្នាក់រដ្ឋមន្ត្រីលើកទី១ នៃប្រទេសទាំងបីកម្ពុជា-វៀតណាម-ឡាវ គឺជាការផ្ដល់ឱកាសដល់​ក្រុមការងារ កងទ័ពប្រទេសទាំងបី បានពង្រឹងពង្រីកកាន់តែជិតស្និទ្ធ នៅចំណងសាមគ្គីភាព មិត្តភាព កិច្ចសហប្រតិបត្តិការ​គ្នាទៅវិញទៅមកក្នុងភាពជាដៃគូយុទ្ធសាស្ត្រគ្រប់ជ្រុងជ្រោយ ។

តាមរយៈនៃការចុះមកពិនិត្យទីតាំងតំបន់ព្រំដែនគោកត្រីកោណមរកត (កន្ទុយនាគ) នឹងធ្វើឲ្យភាគីប្រទេសទាំងបី មើលឃើញកាន់តែច្បាស់អំពីការពួកដៃគ្នា ពូនជ្រុំកសាងខ្សែបន្ទាត់នៃតំបន់ព្រំដែនប្រទេសទាំងបី ប្រកបដោយស្ថេរភាព​នយោបាយ សន្តិសុខ សន្តិភាព និងការអភិវឌ្ឈន៍សេដ្ឋកិច្ចរីកចម្រើន ៕ ដោយ ៖ ឧត្ដម