ភ្នំពេញ៖ ឯកឧត្តម វង់ សូត រដ្ឋមន្រី្តក្រសួងសង្គមកិច្ច អតីតយុទ្ធជន និងយុវនីតិសម្បទា ជួបសម្តែងការគួរសម និងពិភាក្សាការងារជាមួយឯកឧត្តម Justin Kevin Whyatt ឯកអគ្គរដ្ឋទូតវិសាមញ្ញ និងពេញសមត្ថភាព នៃប្រទេសអូស្រ្តាលី ប្រចាំព្រះរាជាណាចក្រកម្ពុជា, នាទីសី្តការក្រសួង ព្រឹកថ្ងៃទី២៤ ខែឧសភា ឆ្នាំ២០៣នេះ។

ជាកិច្ចចាប់ផ្តើមឯកឧត្តម វង់ សូត សូមស្វាគមន៍យ៉ាងកក់ក្តៅចំពោះវត្តមានរបស់ឯកឧត្តម ឯកអគ្គរដ្ឋទូតអូស្រ្តាលី បានមកបំពេញបេសកកម្មនៅព្រះរាជាណាចក្រកម្ពុជា។ អ្វីដែលជាកិច្ចសហប្រតិបតិ្តការរវាងប្រទេសទាំងពីរ កម្ពុជា-អូស្ត្រាលី មានប្រវតិ្តទំនាក់ទំនងអស់រយៈពេលដ៏យូរលង់មកហើយ។

ជាមួយគ្នានោះដែរ ឯកឧត្តម Justin Kevin Whyatt មានសេចកី្តរីករាយជាខ្លាំង ដែលបាន​ត្រឡប់​កម្ពុជា ជាថ្មីម្តងទៀត ដោយមកបំពេញការងារនៅក្នុង​ស្ថានទូត ដែលដំបូងឯកឧត្តម បានមកធ្វើការនៅកម្ពុជា​នៅក្នុងឆ្នាំ២០០២ ហើយក៏ជាឱកាសរបស់ឯកឧត្តម ដែលបានមកជួប​មិត្តភ័ក្ដិ​សារឡើងវិញ ​ហើយក៏ឃើញនូវការផ្លាស់ប្តូរ និងអភិវឌ្ឍន៍របស់កម្ពុជាផងដែរ។ កាលពីឆ្នាំកន្លងទៅ កម្ពុជា-អូស្រ្តាលី បានប្រារព្ធទិវាខួប៧០ឆ្នាំ នៃទំនាក់ទំនងការទូតរវាង​ប្រទេសទាំងពីរ។ ដូច្នេះកម្ពុជា-អូស្រ្តាលី គឺជាដៃគូ និងជា​មិត្តភ័ក្ដិ អស់រយៈពេលជាច្រើនឆ្នាំ ហើយយើងក៏មានសេចកី្តរីករាយ ដែលបានធ្វើជាមួយក្រសួងសង្គមកិច្ច។

ទន្ទឹមនឹងនោះ ឯកឧត្តម ឯកអគ្គរដ្ឋទូត ពិតជាមានសេចកី្តរីករាយជាខ្លាំង ដែលបានឃើញកម្ពុជា ធ្វើជាម្ចាស់ផ្ទះរៀបចំសន្និសីទ ជនមានពិការភាព ប្រចាំតំបន់អាស៊ី និងប៉ាស៊ីហ្វិក លើកទី៥ ស្តីពី ការអភិវឌ្ឍសហគមន៍តាមបែបបរិយាប័ន្ន (ហៅកាត់ CBIDC) ប្រកបដោយជោគជ័យ។ ចំណុច​នេះកម្ពុជា បានរួមចំណែកចែករំលែកនូវការងាររបស់ខ្លួនជាមួយនឹងសហគមន៍។ សម្រាប់អូស្រ្តាលី ការធានាឲ្យមានបរិយាប័ន្ន ទៅលើពិការភាពនេះ គឺជាការងារសំខាន់ណាស់ក្នុងកម្មវិធីរបស់យើង។ ក្នុងនោះក្រោមការដឹកនាំរបស់ឯកឧត្តម រដ្ឋមន្រី្ត ជឿជាក់ថា មានការធ្វើកំណែទម្រង់ជាច្រើន ក្នុងនោះទាក់ទងទៅនឹងផែនការជាតិ ស្តីពី ពិការភាព និងកម្មវិធីសាកល្បង ផ្តល់ប័ណ្ណកី្រក្រ​ជូនដល់ជនមានពិការភាពផងដែរ។ ដូច្នេះនេះជាការកែទម្រង់មួយដ៏ធំ ហើយឯកឧត្តម មានសេចកី្តរីករាយណាស់ក្នុងការចូលរួមធ្វើលើការងារមួយនេះ។ ជាពិសេសនាខែកញ្ញាខាងមុខនេះ ស្ថានទូតអូស្រ្តាលី ​និងដំណើរកម្មវិធីថ្មីមួយបន្ថែមទៀត លើផ្នែកពិការភាពនេះ។​ ដូច្នេះមន្រី្តស្ថានទូត និងត្រៀមធ្វើការជាមួយមន្រី្តក្រសួងសង្គមកិច្ច ដើម្បីធ្វើយ៉ាងណាឲ្យកម្មវិធីថ្មីមួយនេះ អាចចាប់ផ្តើមបានក្នុងខែកញ្ញា ឆ្នាំ២០២៣ខាងមុខនេះ។

ជាការឆ្លើយតប ឯកឧត្តម រដ្ឋមន្រី្ត បានថ្លែងថា ពាក់ព័ន្ធនឹងវិស័យពិការភាពនេះ ក្រសួងកំពុងរៀបចំកែសម្រួលច្បាប់ស្តីពីជនពិការ ឲ្យមានស្ថានភាពកាន់តែល្អប្រសើរ ស្របតាមស្ថានភាពជាក់ស្តែង ពិព្រោះថាច្បាប់នេះ បានធ្វើយូរមកហើយ ដូចនេះមានស្ថានភាពខ្លះមិនទាន់សមស្រប។ ដូច្នេះក្រសួង កំពុងរៀបចំច្បាប់នេះឡើងវិញ ជាក់ស្តែងក្រសួង បានផ្តោតការយកចិត្តទុកដាក់ក្នុងការរៀបចំផ្តល់សេវាវិស័យពិការភាព និយាយជារួមយើងបានខិតខំកែសម្រួលរៀបចំធ្វើយ៉ាងណា ដើម្បីឲ្យការផ្តល់សេវារបស់​យើងកាន់​តែមានភាពល្អប្រសើរសម្រាប់បងប្អូនជនមានពិការភាព។

ជាទូទៅសម្រាប់ក្រសួងសង្គមកិច្ច ជាពិសេសក្នុងដំណាក់កាលដែលរាជរដ្ឋាភិបាល បានផ្តល់នូវកិច្ចអន្តរាគមន៍ ទាក់ទងនឹងការឧបត្ថម្ភសាច់ប្រាក់​ ចំពោះស្ថានភាពកូវីដ-១៩ គឺក្រសួងបានចូលរួមចំណែកជាច្រើន។ នាពេលខាងមុខនេះ រាជរដ្ឋាភិបាល ឲ្យក្រសួងរៀបចំការអន្តរាគមន៍ ហៅថា លក្ខណៈបណ្តោះអាសន្ន ឲ្យទៅជាកម្មវិធីមាននិរន្តរន៍ភាព ល្អប្រសើរជាងមុន ​សម្រាប់បងប្អូនប្រជាពលរដ្ឋ ងាយរងគ្រោះ។

ជាចុងក្រោយ ឯកឧត្តម វង់ សូត បានជូនពរការបំពេញបេសកកម្មរបស់ឯកឧត្តម ឯកអគ្គរដ្ឋទូត សង្ឃឹមថា ប្រទេសយើងទាំងពីរ នឹងមានភាពងាយស្រួលក្នុងពេលបំពេញការងារជាមួយគ្នា និងទទួលភាពជោគជ័យ៕ អត្ថបទ រដ្ឋា