​​មន្ត្រី​អ៊ុយ​ក្រែ​ន និយាយថា កំពង់ផែ Pivdennyi របស់​អ៊ុយ​ក្រែ​ន បាន​បញ្ឈប់​ប្រតិបត្តិការ ព្រោះតែ​រុស្ស៊ី​ពុំ​អនុញ្ញាត​ឲ្យ​នាវា​ចូលមក​កំពង់ផែ​នេះ ដោយ​ធ្វើ​ផ្ទុយទៅនឹង​កិច្ចព្រមព្រៀង ដែល​អនុញ្ញាត​ឲ្យ​មានការ​នាំចេញ​គ្រាប់​ធញ្ញជាតិ​នៅ​សមុទ្រ​ខ្មៅ​ដោយ​សុវត្ថិភាព​។​

​គំនិត​ផ្តួចផ្តើម​គ្រាប់​ធញ្ញជាតិ​នៅ​សមុទ្រ​ខ្មៅ ត្រូវបាន​ចុះហត្ថលេខា​ដោយ​ប្រទេស​រុស្ស៊ី និង​អ៊ុយ​ក្រែ​ន កាលពី​ខែកក្កដា ឆ្នាំ​កន្លងទៅ ហើយ​បាន​បន្ថែម​ពេល​កាលពី​សប្តាហ៍​មុន​រយៈពេល​២​ខែ ក្នុង​គោលបំណង ធានាបាន​ការនាំចេញ​គ្រាប់​ធញ្ញជាតិ​ក្នុងពេល​សង្គ្រាម​ដោយ​សុវត្ថិភាព និង​ស្បៀងអាហារ​ពី​កំពង់ផែ​អ៊ុយ​ក្រែ​ន​ចំនួន​៣​មាន កំពង់ផែ Odesa កំពង់ផែ Chornomorsk និង​កំពង់ផែ Pivdennyi ។​

​អង្គការសហប្រជាជាតិ ដែល​រួមគ្នា​ជាមួយ​ប្រទេស​ទួរគី បាន​សម្របសម្រួល​កិច្ចព្រមព្រៀង​នេះ និង​ការបន្ថែម​ពេល ដែល​បានបង្ហាញ​ការព្រួយបារម្ភ​កាលពី​ថ្ងៃ​ចន្ទ​ថា កំពង់ផែ Pivdennyi នៅ​ជិត​ទីក្រុង Odesa នៅ​សមុទ្រ​ខ្មៅ ពុំបាន​ទទួល​នាវា​មួយគ្រឿង​ណាមួយ​ឡើយ ចាប់តាំងពី​ថ្ងៃទី​២ ខែឧសភា ក្រោម​កិច្ចព្រមព្រៀង​នេះ​។

​កិច្ចព្រមព្រៀង​គ្រាប់​ធញ្ញជាតិ​នៅ​សមុទ្រ​ខ្មៅ ត្រូវបាន​ព្រមព្រៀង​ដើម្បី​ជួយ​ដោះស្រាយ​វិបត្តិ​ស្បៀងអាហារ​សកល ដែល​បានធ្វើ​ឲ្យ​កាន់តែ​ធ្ងន់ធ្ងរ​ដោយ​ការវាយលុក​របស់​ទីក្រុង​មូ​ស្គូ​លើ​ប្រទេស​អ៊ុយ​ក្រែ​ន កាលពី​ខែកុម្ភៈ​ឆ្នាំ​២០២២​។ ក្រោម​កិច្ចព្រមព្រៀង​នេះ នាវា​ទាំងអស់ ទៅកាន់​កំពង់ផែ​អ៊ុយ​ក្រែ​ន ត្រូវតែ​បាន​ត្រួត​ពិ និត្យ​ដោយ​ក្រុមចម្រុះ រួមទាំង​អ្នកត្រួតពិនិត្យ​រុស្ស៊ី​៕​