យោងតាមទិន្នន័យផ្លូវការ ដែលនឹងផ្សារភ្ជាប់ជាមួយការប៉ាន់ប្រមាណ សម្រាប់ការដំឡើងអត្រាការប្រាក់របស់ធនាគារកណ្ដាលរបស់អង់គ្លេស (BoE) បន្ថែមទៀតនោះ បានឲ្យដឹងថា អត្រាអតិផរណាដ៏ខ្ពស់របស់ចក្រភពអង់គ្លេស បានធ្លាក់ចុះតិចជាងការរំពឹងទុក នៅក្នុងខែមេសា ហើយវិធានការស្នូលនៃកំណើនតម្លៃដែលត្រូវបានតាមដានយ៉ាងយកចិត្តទុកដាក់ បានកើនឡើងដល់កម្រិតខ្ពស់ក្នុងរយៈពេល ៣១ឆ្នាំ។
សន្ទស្សន៍តម្លៃទំនិញប្រើប្រាស់ (CPI) បានកើនឡើង ៨,៧% ក្នុងលក្ខខណ្ឌប្រចាំឆ្នាំ នៅខែមេសា ដោយធ្វើឲ្យចក្រភពអង់គ្លេសមានអត្រាអតិផរណាខ្ពស់បំផុតរួម ក្នុងចំណោមប្រទេសសេដ្ឋកិច្ចជឿនលឿនទាំងប្រាំពីរ រួមជាមួយនឹងប្រទេសអ៊ីតាលី។
សេដ្ឋកិច្ចវិទូដែលត្រូវបានស្ទង់មតិដោយសារព័ត៌មាន Reuters បានព្យាករណ៍ថា អត្រាសន្ទស្សន៍តម្លៃទំនិញប្រើប្រាស់ (CPI) ប្រចាំឆ្នាំ នឹងធ្លាក់ចុះមកត្រឹម ៨,២% នៅក្នុងខែមេសា ដោយរំកិលឆ្ងាយពីកម្រិតខ្ពស់ ក្នុងរយៈពេល ៤១ឆ្នាំ នៃចំនួន ១១,១% របស់ខែតុលា។
នៅដើមខែនេះ ធនាគារកណ្ដាលអង់គ្លេស បានព្យាករអតិផរណា ៨,៤% សម្រាប់ខែមេសា។
លោក Paul Dales ប្រធានសេដ្ឋវិទូជាន់ខ្ពស់របស់ចក្រភពអង់គ្លេស នៅក្រុមហ៊ុន Capital Economics បាននិយាយថា៖ «ដោយអតិផរណា ដែលស្តែងឲ្យឃើញពីភាពមិនច្បាស់លាស់ខ្លាំងជាងធនាគាររំពឹងទុក ឥឡូវនេះ ហាក់បញ្ជាក់ឲ្យឃើញកាន់តែប្រាកដណាស់ថា ធនាគារនឹងដំឡើងអត្រាការប្រាក់ពី ៤,៥០% ទៅ ៤.៧៥% នៅក្នុងខែមិថុនា ហើយប្រហែលជាបន្ថែមបន្តិចទៀត នៅក្នុងប៉ុន្មានខែក្រោយ»។
ធនាគារកណ្ដាលអង់គ្លេស គ្រោងនឹងប្រកាសការសម្រេចចិត្តបន្ទាប់របស់ខ្លួនពាក់ព័ន្ធនឹងអត្រាការប្រាក់ នៅថ្ងៃទី២២ ខែមិថុនា ហើយបន្ទាប់ពីការបញ្ចេញទិន្នន័យកាលពីថ្ងៃពុធ ក្រុមវិនិយោគិនបានកំណត់លទ្ធភាពបង្កើនការចំណាយលើការខ្ចីប្រាក់០,២៥%បន្ថែមទៀតនៅខែក្រោយ គិតក្នុងកម្រិត ១០០ភាគរយដែលកើនឡើងពី ៨៣ភាគរយ កាលពីថ្ងៃអង្គារ៕
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
