អភិបាលរដ្ឋ Florida លោក រ៉ុន ឌីសាន់ទីស( Ron DeSantis )បានចូលប្រឡូកក្នុងការប្រជែងតំណែង​ប្រធានាធិបតីឆ្នាំ ២០២៤ កាលពីថ្ងៃពុធ ដោយបោះជំហានចូលទៅក្នុងការប្រកួតបឋមខាង​គណបក្សសាធារណរដ្ឋ ដែលនឹងសាកល្បងទាំងការអំពាវនាវទូទាំងប្រទេសរបស់លោក ក្នុងនាមជាអ្នកនយោបាយអភិរក្សវប្បធម៌ ទាំងបំណងប្រាថ្នារបស់គណបក្សនេះ ក្នុងការងាកចេញពីអតីតប្រធានាធិបតីលោក Donald Trump ។

អ្នកសាធារណរដ្ឋវ័យ៤៤ ឆ្នាំរូបនេះ បានបង្ហាញពីការសម្រេចចិត្តរបស់លោកនៅក្នុងឯកសាររបស់គណៈកម្មាធិការរៀបចំការបោះឆ្នោតសហព័ន្ធ មុនពេលការសន្ទនាតាមអ៊ីនធឺណិតជាមួយនាយកប្រតិបត្តិ ក្រុមហ៊ុនTwitter លោក Elon Musk ។

យុទ្ធនាការនេះបញ្ជាក់ពីទំព័រថ្មីមួយនៅក្នុងការកើនឡើងប្រជាប្រិយភាពដ៏លេចធ្លោររបស់លោកពីសមាជិកសភាដែលគេមិនសូវស្គាល់ ទៅជាអភិបាលរដ្ឋពីរអាណត្តិ និងក្លាយជាបុគ្គលឈានមុខគេ ក្នុងការប្រកួតប្រជែងដ៏ស្វិតស្វាញរបស់ប្រទេសជុំវិញបញ្ហារើសអើងពូជសាសន៍ ការកំណត់អត្តសញ្ញាណភេទ ការរំលូតកូន និងបញ្ហាខ្វែងកំនិតគ្នាផ្សេងទៀត។

លោក DeSantis ត្រូវបានចាត់ទុកថា ជាគូប្រជែងខាងគណបក្សសាធារណរដ្ឋដ៏ខ្លាំងបំផុតរបស់លោក Trump បើទោះបីជាអភិបាលរដ្ឋរូបនេះ ប្រឈមនឹងបញ្ហានានាអំពីការត្រៀមខ្លួន​របស់លោក​សម្រាប់កម្រិតជាតិក៏ដោយ។

ការប្រកាសតាមខ្សែអាត់សំឡេងរបស់លោក DeSantis ត្រូវចាក់ផ្សាយនៅលើបណ្ដាញសង្គមTwitter Spaces ចាប់ពីម៉ោង ៦ ល្ងាច ម៉ោងនៅសហរដ្ឋអាមេរិក។

លោកកំពុងតាមដានជាមួយនឹងការបង្ហាញខ្លួនដំបូងក្នុងកម្មវិធីអភិរក្សដែលរួមមានទូរទស្សន៍ Fox News និងកម្មវិធីវិទ្យុរបស់ Mark Levin។

ការហក់ចូលរបស់DeSantisទៅក្នុងការប្រកួតប្រជែងខាងគណបក្សសាធារណៈរដ្ឋត្រូវលេចលឺជាពាក្យ ចាមអារ៉ាមជាច្រើនខែ មកហើយ ហើយលោកត្រូវបានគេចាត់ទុកថា​ជាបេក្ខជនខ្លាំងបំផុត​របស់គណបក្សនេះនៅក្នុងដំណើរស្វែងរកការដណ្តើមយកកៅអីសេតវិមានឡើងវិញពីប្រធានាធិបតីមកពីបក្សប្រជាធិបតេយ្យ លោកJoe Biden ។

សមាជិកមកពីគណបក្សសាធារណរដ្ឋរូបនេះ បាននិយាយថា អ្នកកាន់អំណាចវ័យ៨០ឆ្នាំរូបនេះ បានរុញច្រានសហរដ្ឋអាមេរិកឲ្យទៅខាងឆ្វេងនិយមឆ្ងាយពេក ខណៈពុំបានដោះស្រាយអតិផរណា អន្តោប្រវេសន៍ និងឧក្រិដ្ឋកម្មនៅក្នុងប្រទេសនេះ៕