​ភ្នំពេញ៖ ប្រជាពលរដ្ឋមានពិការភាព បានបង្ហាញនូវចំណាប់អារម្មណ៍ថា ព្រឹត្តិការណ៍កីឡាអាស៊ានប៉ារ៉ាហ្គេម គឺជាវេទិកាបង្ហាញឱ្យពិភពលោកមើលឃើញពីសមត្ថភាពរបស់ជនមានពិការភាព ដែលអាចធ្វើអ្វីបានដូច មនុស្ស ដែលមានកាយសម្បទាគ្រប់គ្រាន់ដែរ ។

ព្រឹត្តិការណ៍កីឡាអាស៊ានប៉ារ៉ាហ្គេម នឹងឈានចូលមកដល់ក្នុងរយៈពេល៩ថ្ងៃទៀត ដែលសម្រាប់ អ្នកគាំទ្រកីឡានេះ បានបង្ហាញនូវមោទកភាពចំពោះជនមានពិការភាព ដែលមានសមត្ថភាពចូលរួម​ប្រកួត និងចង់បង្ហាញថា ពិការភាព មិនមែនជាឧបសគ្គរារាំងពួកគេ មិនឱ្យធ្វើអ្វីបាននោះទេ ។

ក្រុមអ្នកគាំទ្រ ​បានសម្ដែងមោទកភាពចំពោះភាពអាស្ចារ្យ ដែលអត្តពលិកមានពិការ​ភាព​អាចធ្វើបាន ។

ក្រុមពលរដ្ឋ ដែលមានពិការភាព និងជាអ្នកគាំទ្រផងនោះ បានបញ្ជាក់ថា ​ពួកគេនឹងចូលរួមគាំទ្រ លើកទឹកចិត្តក្រុមកីឡាករមានពិការភាពជានិច្ច និងរំពឹងថា ​កីឡាករ កីឡាការនីមានពិការភាពរបស់​កម្ពុជា នឹងខិតខំប្រឹងប្រែងឱ្យអស់ពីសមត្ថភាព ​ក្នុងការប្រកួតដណ្តើមយកជ័យជម្នះជូនខ្លួនឯង ជូនក្រុម ក៏ដូចជា ជូនជាតិមាតុភូមិផងដែរ ។

ព្រឹត្តិការណ៍កីឡាអាស៊ានប៉ារ៉ាហ្គេម លើកទី១២ ដែលកម្ពុជា ធ្វើជាម្ចាស់ផ្ទះ ​នឹងចាប់ផ្ដើមនៅថ្ងៃ ទី០៣ ដល់ថ្ងៃទី០៩ ខែមិថុនា ឆ្នាំ២០២៣ ៕ អត្ថបទ៖ លីហេង