ភ្នំពេញ៖ ការហាត់សមត្រៀមបើកព្រឹត្តិការណ៍អាស៊ានប៉ារ៉ាហ្គេមលើកទី១២ បានចាប់ផ្ដើម ដែលផែននារីកម្ពុជា ជាផែនមួយក្នុងចំណោមទស្សនីយភាពដទៃទៀត នឹងត្រូវសម្តែងក្នុងពិធីបើកព្រឹត្តិការណ៍នេះ ។

លោកជំទាវ សុទ្ធ សុមាលី អនុរដ្ឋលេខាធិការក្រសួងវប្បធម៌ និងវិចិត្រសិល្បៈ និងជាគ្រូបង្គោល ទទួលបន្ទុកផែននារីកម្ពុជា បានប្រាប់BTVនៅថ្ងៃនេះថា ការសម្រេចយកផែននារីកម្ពុជា ក្នុងឈុតបេះដូង ខ្មែរ សម្តែងក្នុងពិធីបើកព្រឹត្តិការណ៍អាស៊ានប៉ារ៉ាហ្គេម ព្រោះចង់បង្ហាញ​ពី​ការចូលរួមចំណែករបស់នារី កម្ពុជា ទទួលស្វាគមន៍ភ្ញៀវជាតិ និងអន្តរជាតិ។ ការហាត់សមផែននារីកម្ពុជា មានអ្នកចូលរួម ជាង១០០ នាក់។

អ្នកចូលរួមហាត់សម្តែង បានលើកឡើងថា ការហាត់សមផែននារីកម្ពុជា មានភាពលំបាកខ្លះៗដែរ តែនឹងព្យាយាមហាត់ឱ្យបានល្អ ដើម្បីបង្ហាញការទាក់ទាញទៅដល់ភ្ញៀវជាតិ និងអន្តរជាតិ ពេលមកចូលរួមទស្សនាពិធីបើកព្រឹត្តិការណ៍អាស៊ានប៉ារ៉ាហ្គេម។

ពិធីបើកព្រឹត្តិការណ៍កីឡាអាស៊ានប៉ារ៉ាហ្គេម លើកទី១២ ក្រសួងវប្បធម៌ និងវិចិត្រសិល្បៈ គ្រោង បង្ហាញទស្សនីយភាពពិសេសៗមានដូចជា​ ផែនស្គរ និងនារីកម្ពុជា ផែនពាក់វ៉ែនតាខ្មៅ ផែនរបាំបេះដូងខ្មែរ និងផែនហែក្បួន ជាដើម។

ព្រឹត្តិកាណ៍អាស៊ានប៉ារ៉ាហ្គេមលើកទី១២ ដែលប្រទេសកម្ពុជារៀបចំធ្វើម្ចាស់ផ្ទះ នឹងចាប់ផ្តើមពីថ្ងៃ ទី៣ ដល់ថ្ងៃទី៩ ខែមិថុនា ឆ្នាំ២០២៣ ដោយមានការប្រកួតកីឡាចំនួន១៣ប្រភេទ៕អត្ថបទ៖ ទូច សោភ័ណ