ភ្នំពេញ៖ ក្នុងរយៈពេល ៤ខែដើមឆ្នាំ២០២៣ ធៀបនឹងរយៈពេលដូចគ្នានៃឆ្នាំ២០២២ ស្ថានភាពគ្រោះថ្នាក់ចរាចរ ណ៍ត្រូវបានកាត់បន្ថយចំនួន១៥៤លើកស្មើនឹង១៣%។ ចំនួនអ្នកស្លាប់ថយ១៨០នាក់ ស្មើនឹង២៦% អ្ន ករបួសថយចំនួន ៣០១នាក់ ស្មើនឹង១៨%។ នេះបើតាមសម្ដេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ ថ្លែងក្នុងទិវាសប្តាហ៍ជាតិសុវត្ថិភាពចរាចរណ៍ផ្លូវគោកលើកទី១៤ ដែលរៀប ចំធ្វើនៅក្រុងតាខ្មៅ ខេត្តកណ្ដាល នាព្រឹកថ្ងៃទី២៥ ខែឧសភា ឆ្នាំ២០២៣។
ក្នុងពិធីនោះដែរ សម្ដេចក្រឡាហោម ក៏បានថ្លែងអំណរគុណចំពោះអង្គការជាតិ និងអន្តរជាតិ បណ្ដាញសារព័ត៌មាន ក្រុមហ៊ុនឯកជន រោងចក្រសហគ្រាស និងប្រជាពលរដ្ឋទាំងអស់ដែលបានចូលរួមយ៉ាងសកម្មតាមការអំពាវនាវ ឬសេចក្តីប្រកាសរបស់គណៈកម្មាធិការជាតិសុវត្ថិភាពចរាចរណ៍ផ្លូវគោក ក្នុងបំណងជំរុញការរក្សាសុវត្ថិភាពចរាចរណ៍ផ្លូវគោកឱ្យកាន់តែប្រសើរឡើងជាលំដាប់។
ក្រៅពីលើកឡើងបែបនេះ សម្ដេចក្រឡាហោម ស ខេង ក៏បានមានប្រសាសន៍ដែរថា កម្ពុជាក្រោមការដឹកនាំប្រកបដោយគតិបណ្ឌិតរបស់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី រាជរដ្ឋាភិបាលបានយកចិត្តទុកដាក់ និងគាំទ្រឱ្យមានការប្រារព្ធទិវាសប្ដាហ៍ជាតិសុវត្ថិភាពចរាចរណ៍ផ្លូវគោ កនេះជារៀងរាល់ឆ្នាំ ដើម្បីលើកកម្ពស់ការយល់ដឹងរបស់ប្រជាពលរដ្ឋអំពីហានិភ័យនៃគ្រោះថ្នាក់ចរាចរណ៍ដែលបានបង្កអន្តរាយដល់អាយុជីវិតមនុស្ស ខូចខាតទ្រព្យសម្បត្តិ និងពេលវេលាជាច្រើនរបស់ឯកជននិងសាធារណៈ ព្រមទាំងបំផុសស្មារតីឱ្យប្រជាពលរដ្ឋគោរពច្បាប់ចរាចរណ៍ បើកបរប្រកាន់ខ្ជាប់នូវសីលធម៌ ចេះយោគយល់អធ្យាស្រ័យ គោរពសិទ្ធិគ្នា និងបង្កើនការប្រុងប្រយ័ត្នខ្ពស់ ដើម្បីចូលរួមទប់ស្កាត់បញ្ហាគ្រោះថ្នាក់ចរាចរណ៍ឱ្យស្ថិតនៅក្នុងអត្រាទាបបំផុត។
សម្ដេចបន្តថា ក្នុងស្ថានភាពដែលប្រទេសកម្ពុជារក្សាបាននូវសុខសន្តិភាព និងស្ថិរភាពនយោបាយ វិស័យសេដ្ឋកិច្ច និងវិស័យគមនាគមន៍មានការរីកចម្រើនជាលំដាប់ ព្រមជាមួយកំណើនយានយន្តគ្រប់ប្រ ភេទបានកើនឡើងជារៀងរាល់ឆ្នាំ ហើយបញ្ហាគ្រោះថ្នាក់ចរាចរណ៍ក៏នៅតែកើតមានជារៀងរាល់ថ្ងៃ បើទោះបីជាវាមានកម្រិតមួយទាបជាងមុនក៏ដោយ។ ហេតុដូច្នេះហើយ ប្រមុខរាជរដ្ឋាភិបាលបានណែនាំអង្គភាពពាក់ព័ន្ធទាំងអស់រួមគ្នាធ្វើយ៉ាងណាទប់ស្កាត់ និងកាត់បន្ថយបញ្ហាចរាចរណ៍នេះឱ្យនៅត្រឹមក ម្រិតទាបជាទីបំផុត។
សម្ដេច ស ខេង ក៏បានអំពាវនាវដល់ពលរដ្ឋដែលជាអ្នកប្រើប្រាស់ផ្លូវ ក៏ដូចជាក្រុមហ៊ុនដឹកជញ្ជូនទាំងអស់ សូមចូលរួមគោរពអនុវត្តតាមអនុសាសន៍ដ៏ថ្លៃថ្លារបស់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី គឺ«ថ្ងៃនេះ ថ្ងៃស្អែក កុំឱ្យមានគ្រោះថ្នាក់ចរាចរណ៍» ពោលគឺរួមគ្នាគោរពអនុវត្តច្បា ប់ចរាចរណ៍ មិនមែនខ្លាចមន្ត្រីនគរបាលចរាចរណ៍នោះទេ៕
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
