អ្នកស្រុកនៅប្រទេសស៊ូដង់ បាននិយាយ កាលពីថ្ងៃពុធ (ទី២៤ ខែឧសភា) ថា សំឡេងនៃការប្រយុទ្ធគ្នា រវាងក្រុមយោធាដែលជាគូបដិបក្ស អាចត្រូវបានឮពេញមួយយប់ ក្នុង​ផ្នែក​ខ្លះ​នៃ​រដ្ឋធានី​នៃប្រទេសមួយនេះ បើទោះបីជាមានបទឈប់បាញ់រយៈពេលមួយសប្តាហ៍ ដែលត្រូវបានរៀបចំឡើង ដើម្បីអនុញ្ញាតឲ្យមានការផ្តល់ជំនួយ និងរៀបចំ​ឲ្យមានបទឈប់បាញ់​រយៈ​ពេល​យូរបន្ថែមទៀតក៏ដោយ។

នៅទីក្រុងហ្សឺណែវ ស្នងការជាន់ខ្ពស់ទទួលបន្ទុកសិទ្ធិមនុស្សរបស់អង្គការសហប្រជាជាតិ ឬ UN លោក Volker Turk បានពណ៌នាអំពីស្ថានភាពនេះថា ជារឿង«ដែលគួរឲ្យបារម្ភខ្លាំង» ដោយ​លោក​បាននិយាយថា៖ «ជនស៊ីវិលត្រូវតែទទួលបានការរស់រានមានជីវិត ហើយអ្នកត្រូវតែបញ្ឈប់អំពើហិង្សាដែលគ្មានន័យខ្លឹមសារ ឥឡូវនេះ»។

លោក​ Turk បានបន្តថា៖ «ទោះបីជាមានបទឈប់បាញ់ជាបន្តបន្ទាប់ ហើយពួកគេបន្តការរៀបចំកិច្ចព្រមព្រៀងថែមទៀតក៏ដោយ ក៏យើងឃើញថា បទឈប់​បាញ់ទាំង​នោះគោរព​តែ​ពាក្យ​​សម្តីត្រឹម​តែប៉ុន្មានម៉ោង បន្ទាប់ពីកិច្ចព្រមព្រៀងទាំងនេះ ត្រូវបានចុះហត្ថលេខា។ យើងឃើញពីរបៀប ដែលជនស៊ីវិល បន្តប្រឈមនឹងហានិភ័យធ្ងន់ធ្ងរពីការស្លាប់ និងមាន​របួស​។ ខ្ញុំ​ចង់មានន័យថា ពេញមួយយប់ យើងបានទទួលរបាយការណ៍អំពីយន្តហោះចម្បាំងហោះកាត់ទីក្រុងខាទូម (Khartoum ) និងការប៉ះទង្គិចគ្នានៅក្នុងតំបន់មួយចំនួននៃទីក្រុង ក៏ដូច​​ជា​ការ​​បាញ់​ប្រហារ ដែលបានឮនៅក្រុងខាទូមខាងជើង និងទីក្រុង Omdurman»។

ជា​មួ​យគ្នានេះ លោកស្នងការជាន់ខ្ពស់ទទួលបន្ទុកសិទ្ធិមនុស្សរូបនេះ ក៏បានលើកឡើងផងដែរពាក់ព័ន្ធនឹងកង្វល់ដ៏ធំចំពោះរបាយការណ៍ពីអំពើហិង្សាផ្លូវភេទ នៅក្នុងទីក្រុងខាទូម (Khar​to​um​) និងដាហ្វួរ (Darfur) ដោយលោកបានអំពាវនាវដល់ប្រមុខកងទ័ពលោកឧត្តមសេនីយ៍ Abdul Fattah al-Burhan និងលោកឧត្តមសេនីយ៍ Mohamed Hamdan Dagalo មេ​ដឹក​នាំ​​កង​កម្លាំង​​ប្រដាប់អាវុធគាំទ្ររហ័សយោធាប៉ារ៉ាឲ្យចេញសេចក្តីបង្គាប់ណែនាំយ៉ាងច្បាស់លាស់ដល់អ្នក ដែលស្ថិតនៅក្រោមបញ្ជារបស់ពួកគេថាគ្មានការអត់ឱន ចំពោះ​អំពើ​ហិង្សា​ផ្លូវ​ភេទ​​ជា​ដាច់​​ខាត ហើយជនល្មើសនៃការរំលោភបំពានទាំងអស់ ត្រូវទទួលខុសត្រូវចំពោះទង្វើរបស់ខ្លួន។

កិច្ច​​​​​ព្រមព្រៀងបទឈប់បាញ់ បន្ទាប់ពីមានកិច្ចចរចា ដែលសម្របសម្រួលដោយប្រទេសអារ៉ាប៊ីសាអូឌីត និងសហរដ្ឋអាមេរិក កើតឡើង ក្រោយមានសង្គ្រាម​ដ៏តាន​តឹងរយៈ​ពេល​ប្រាំ​សប្តាហ៍​៕