ភ្នំពេញ៖ សម្តេចអគ្គមហាសេនាបេតីតេជោ ហ៊ុន សែន នាយករដ្ឋមន្រ្តីកម្ពុជា មានប្រសាសន៍ថា ការធ្វើពិពិធកម្មទីផ្សារ បានជួយរក្សាការនាំចេញមានកំណើន បើទោះសេដ្ឋកិច្ចសកលបានធ្វើឱ្យប៉ះពាល់ដល់ប្រទេសធំៗ ដែលជាទីផ្សារសំខាន់សម្រាប់ទំនិញរបស់កម្ពុជា នាំចេញទៅថយចុះ។

ក្នុងពិធីសំណេះសំណាលជាមួយបងប្អូនកម្មករនិយោជិតនៅទីតាំងរោងចក្រ ម៉ាវ៉ល ហ្កាមិន ក្នុងតំបន់ សេដ្ឋកិច្ចពិសេស រ៉ូយ៉ាល់ គ្រុប ភ្នំពេញ សម្តេចតេជោ ហ៊ុន សែន មានប្រសាសន៍ថា ការនាំចេញទំនិញរបស់កម្ពុជា ទៅកាន់ទីផ្សារប្រទេសមួយចំនួនធ្លាក់ចុះដោយសារ ស្ថានភាព​សេដ្ឋកិច្ច​ពិភពលោកធ្លាក់ចុះ ប៉ុន្តែការនាំចេញទៅទីផ្សារប្រទេសផ្សេងទៀត មាន​និន្នាការ​កើនឡើង ដែលជំនួសឱ្យគ្នាទៅវិញទៅមក។

សម្តេចតេជោ ហ៊ុន សែន មានប្រសាសន៍ថា៖ “បញ្ហារបស់យើងមិនមែនពឹងពាក់លើផ្សារមួយ​ឬពីរទេ យើងពឹងពាក់លើផ្សារច្រើន។ បើទោះបីជាកន្លែងខ្លះមាន ហានិភ័យទាក់ទិននឹងការធ្លាក់ចុះ​នៃ​សេដ្ឋកិច្ចរបស់ប្រទេសគេ ការនាំចេញរបស់ប្រទេសយើងចំពោះប្រទេសនោះ មានការថមថយ ប៉ុន្តែយើងបែរជាកើននៅកន្លែងផ្សេងទៅវិញ។ ដូច្នេះហើយបានអត្រានៃការនាំចេញ ក៏វាមិនថមថយ​ទេ ព្រោះស្ថានភាពសេដ្ឋកិច្ចនៅលើពិភពលោកនេះ វាមានប្រទេសនេះឡើង ប្រទេសនោះចុះ”។

យោងតាមរបាយការណ៍អគ្គនាយកដ្ឋានគយ និងរដ្ឋាករ កម្ពុជានាំចេញទំនិញមានទំហំទឹកប្រាក់​ប្រមាណជាង ៧ពាន់លានដុល្លារ ក្នុងរយៈពេល៤ខែដើមឆ្នាំ២០២៣នេះ ធ្លាក់ចុះ៥ភាគរយ ធៀប​នឹងរយៈពេលដូចគ្នាកាលពីឆ្នាំ២០២២ ដែលមានទឹកប្រាក់ជិត៨ពាន់លានដុល្លារ៕ អត្ថបទ៖ វណ្ណៈ