ភ្នំពេញ៖ សម្ដេចតេជោ ហ៊ុន សែន នាយករដ្ឋមន្រ្ដីនៃកម្ពុជា បានអំពាវនាវដល់កម្មករ កម្មការិនីចូលរួមគាំទ្រដល់អត្តពលិកមានពិការភាពរបស់កម្ពុជា ដែលត្រូវចូលរួមប្រកួតក្នុងព្រឹត្តិការណ៍អាស៊ានប៉ារ៉ាហ្គេមលើកទី១២ ដែលកម្ពុជាធ្វើជាម្ចាស់ផ្ទះនេះឱ្យបានច្រើនកុះករ។

សម្ដេចតេជោ ហ៊ុន សែន នាយករដ្ឋមន្ត្រីនៃកម្ពុជា បានមានប្រសាសន៍បែបនេះ ក្នុងឱកាសអញ្ជើញសំណេះសំណាលជាមួយបងប្អូនកម្មករនិយោជិតនៅទីតាំងរោងចក្រ ម៉ាវ៉ល ហ្កាមិន (Marvel Garment) ក្នុងតំបន់សេដ្ឋកិច្ចពិសេស រ៉ូយ៉ាល់ គ្រុប ភ្នំពេញជិត ២ម៉ឺននាក់ នាព្រឹកថ្ងៃទី ២៦ ខែឧសភា ឆ្នាំ២០២៣ នេះ។

សម្ដេចតេជោ បានមានប្រសាសន៍ថា ក្រុមកីឡាករ កីឡាការិនីមានពិការភាពរបស់កម្ពុជា នឹងចូលរួមប្រកួតក្នុងព្រឹត្តិការណ៍អាស៊ានប៉ារ៉ាហ្គេមលើកទី១២ ដែលកម្ពុជាធ្វើជាម្ចាស់ផ្ទះ ដែលនៅសល់ពេលតែ ៨ ថ្ងៃទៀតនឹងឈានមកដល់។ ក្រុមអត្តពលិកមានពិការភាព ក៏មិនខុសពីអត្តពលិកដែលគ្មានពិការភាពដែរ ពួកគេបានខិតខំ​ហ្វឹកហាត់ ដើម្បីប្រកួត​តំណាងកម្ពុជាក្នុងព្រឹត្តិការណ៍ដ៏អស្ចារ្យនេះដែលកម្ពុជាធ្វើជាម្ចាស់ផ្ទះ។

សម្ដេចតេជោ នាយករដ្ឋមន្រ្ដី បានណែនាំឱ្យមានការបន្ថែមការបាញ់កាំជ្រួចបន្ថែមទៀត​នៅ​ក្នុងកម្មវិធីបើកព្រឹត្តិការណ៍អាស៊ានប៉ារ៉ាហ្គេម នៅល្ងាចថ្ងៃទី៣ ខែមិថុនា បូករួមជាមួយ​នឹងទស្សនីយភាពផ្សេងៗជាច្រើនទៀត។

សូមជម្រាបថា ព្រឹត្តិការណ៍អាស៊ានប៉ារ៉ាហ្គេម ដែលកម្ពុជាធ្វើជាម្ចាស់ផ្ទះជាលើកដំបូងនេះ គឺ​នឹងប្រព្រឹត្តិទៅ ចាប់ពីថ្ងៃទី ៣មិថុនា ដល់ថ្ងៃទី ៩មិថុនា ឆ្នាំ២០២៣។ ព្រឹត្តិការណ៍នេះ មានការ​ប្រកួតលើ ១៤ ប្រភេទកីឡា ក្នុងនោះមាន ១ ​ប្រភេទកីឡា ជាកីឡាបង្ហាញពុំមានមេដាយនោះទេ៕

អត្ថបទ៖ វ៉ន ដារ៉ា