តួលេខដែលបានកែសម្រួលឡើងវិញ បង្ហាញថា ផលិតផលក្នុងស្រុកសរុប ឬ GDP របស់អាល្លឺម៉ង់ ធ្លាក់ចុះនៅក្នុងត្រីមាសទី១ ខណៈការមិនសូវមានសកម្មភាពនៃអ្នកប្រើប្រាស់ និងឧស្សាហកម្ម បានបង្កើនការបារម្ភខ្លាំងឡើងៗថា ប្រទេសមានសេដ្ឋកិច្ចធំបំផុតរបស់អឺរ៉ុបមួយនេះ នឹងទទួលរងនូវឱនភាពធ្ងន់ធ្ងរ។

Destatis ដែលជាទីភ្នាក់ងារស្ថិតិសហព័ន្ធ បានឲ្យដឹងថា សេដ្ឋកិច្ចអាល្លឺម៉ង់ បានធ្លាក់ចុះ ០,៣ភាគរយ ក្នុងរយៈពេល ៣ខែ គិតត្រឹមខែមីនា បន្ទាប់ពីការពិនិត្យឡើងវីញនៃធ្លាក់​ចុះពីការ​ប៉ាន់ស្មាន​ដំបូងនៃកំណើនសូន្យ។ សេដ្ឋវិទូមួយចំនួន បានរំពឹងថា នឹងមានការដាំក្បាលចុះ បន្ទាប់ពីផលិតកម្មឧស្សាហកម្មរបស់អាល្លឺម៉ង់ ​បានទទួលរងនូវការធ្លាក់ចុះដ៏ធំបំផុតរបស់ខ្លួន ក្នុងរយៈពេល១២ខែ​ ហើយការលក់រាយបានស្រុតចុះយ៉ាងគំហុក កាលពីខែមីនា។

សេដ្ឋវិទូ បាននិយាយថា ការធ្លាក់ចុះនៃផលិតផលក្នុងស្រុកសរុប ឬ GDP ប្រចាំត្រីមាស ជាលើកទី២ ជាប់ៗគ្នា ដែលជាទិន្នផលបង្រួមដោយកែសម្រួលការធ្លាក់ចុះ ០,៥ភាគរយ នៅក្នុងត្រីមាសចុង​ក្រោយ​នៃឆ្នាំមុន ស្របតាមការកំណត់ន័យជាលក្ខណៈបច្ចេកទេស គឺមហាអំណាចឧស្សាហកម្ម នៅតំបន់អឺរ៉ុប ដែលកំពុងប្រឈមនឹងឱនភាព។

អ្នកវិភាគភាគច្រើនរំពឹងថា ប្រទេសអាល្លឺម៉ង់នឹងសម្រេចបាននូវកំណើនដ៏ខ្សោយ នៅឆ្នាំនេះ ដោយក្រុមប្រឹក្សាអ្នកជំនាញសេដ្ឋកិច្ចរបស់ប្រទេស ថ្មីៗនេះ បានព្យាករថា នឹងមានកំណើន ០,២ភាគរយ សម្រាប់ផលិតផលក្នុងស្រុកសរុប ឬ GDP ឆ្នាំ២០២៣នេះ។ ប៉ុន្តែសេដ្ឋវិទូជាច្រើន បារម្ភថា ប្រទេសមានសេដ្ឋកិច្ចធំបំផុតរបស់តំបន់អឺរ៉ុបមួយនេះ នឹងនៅតែស្ថិតក្នុងភាពមិនច្បាស់លាស់ដដែល។

មូលហេតុចម្បងនៃដំណើរប្រតិបត្តិការមិនស្របតាមការចង់បានរបស់ប្រទេសអាល្លឺម៉ង់ នៅក្នុងត្រីមាសទី១ នេះ គឺការធ្លាក់ចុះនៃការប្រើប្រាស់ក្រុមគ្រួសារ ដែលបានធ្លាក់ចុះ ១,២ភាគរយ ធៀបនឹងត្រីមាសមុន ដោយសារអតិផរណាខ្ពស់ និងការដំឡើងអត្រាការប្រាក់បានធ្វើឲ្យចុះខ្សោយ​កម្លាំង​ទិញរបស់អ្នកប្រើប្រាស់។

ទីភ្នាក់ងារ Destatis បានឲ្យដឹងនៅក្នុងសេចក្តីថ្លែងការណ៍មួយថា៖ «ភាពអល់អែករបស់ក្រុមគ្រួសារ​ទាំងឡាយ ក្នុងការទិញ បង្ហាញយ៉ាងច្បាស់ នៅក្នុងវិស័យផ្សេងៗ ដែលមានដូចជាបានចំណាយ​តិច​លើអាហារ និងភេសជ្ជៈ សំលៀកបំពាក់ និងស្បែកជើង​ និងលើគ្រឿងសង្ហារិម ក្នុងត្រីមាសទី១ ឆ្នាំ២០២៣ ធៀបនឹងត្រីមាសមុន»៕