ពិធីគោរពវិញ្ញាណក្ខន្ធ កំពុងធ្វើឡើងនៅជុំវិញពិភពលោក ចំពោះវីរនារីផ្នែកតន្ត្រី លោកស្រី Tina Tuner បន្ទាប់ពីតារាចម្រៀងរូបនេះ បានទទួលមរណភាព ក្នុងវ័យ៨៣ឆ្នាំ ក្រោយពីមានជំងឺ ក្នុងរយៈពេលដ៏យូរ។
កំពូលតារាចម្រៀងស្រី Turner ដែលមានប្រជាប្រិយភាពយ៉ាងខ្លាំងតាមរយៈបទចម្រៀងជាច្រើនរួមមានបទ ដែលមានចំណងជើងថា «Proud Mary» និង «The Best» បានលាចាកលោកនេះ ដោយជរាពាធ នៅឯគេហដ្ឋានរបស់លោកស្រី ក្នុងក្រុង Kusnacht ក្បែរទីក្រុង Zurich ប្រទេសស្វីស កាលពីថ្ងៃពុធ។
ក្នុងអាជីពមានរយៈពេលជាង ៦០ឆ្នាំ តារាចម្រៀងជនជាតិអាមេរិក-សញ្ជាតិស្វីសរូបនេះ បានឈ្នះពានរង្វាន់ Grammy ចំនួន៨ ដែលមានការប្រកួតប្រជែង និងទទួលបានផ្កាយទាំងនៅលើកម្រាលកិត្តិយស Hollywood Walk of Fame និង St Louis Walk of Fame ។
បន្ទាប់ពីមានការប្រកាសពីមរណភាពរបស់តារាចម្រៀង Turner កាលពីល្ងាចថ្ងៃពុធ តន្ត្រីករ តារាសម្ដែង និងតារាល្បីៗផ្សេងទៀត បានចាប់ផ្តើមធ្វើការគោរពវិញ្ញាណក្ខន្ធ ចំពោះតារាចម្រៀង ដែលត្រូវបានគេស្គាល់យ៉ាងទូលំទូលាយថា ជារាជិនីនៃតន្ត្រីរ៉ុកខិនរ៉ូល (Queen of Rock and Roll)។
ការចូលរួមរំលែកទុក្ខ មានតារានាំមុខរបស់ក្រុម Rolling Stones លោក Sir Mick Jagger ដែលបានច្រៀងរួមគ្នាជាមួយលោកស្រី Turner អំឡុងការប្រគុំតន្ត្រីកម្មវិធី Live Aid ក្នុងឆ្នាំ១៩៨៥។ គាត់បានសម្តែងការសោកសៅ ចំពោះដំណឹងនៃមរណភាពរបស់លោកស្រី នៅលើបណ្ដាញសង្គម Instagram ដោយសរសេរថា៖ «ខ្ញុំពិតជាសោកស្ដាយណាស់ ចំពោះការបាtបង់មិត្តដ៏ល្អបំផុតរបស់ខ្ញុំគឺ Tina Turner»។
ក្នុងចំណោមតារាជួរមុខទាំងអស់នោះ តារាចម្រៀងស្រីដ៏ល្បីល្បាញ Beyoncé បានឧទ្ទិសសារជាពិសេសដល់អ្នករួមអាជីពរៀមច្បង លោកស្រី Turner ដោយការសរសេររៀបរាប់ថា៖ «រាជិនីជាទីស្រឡាញ់របស់ខ្ញុំ ខ្ញុំស្រឡាញ់គ្មានថ្ងៃភ្លេចទេ។ ខ្ញុំមានសេចក្ដីដឹងគុណយ៉ាងធំធេង ចំពោះគំនិតជំរុញទឹកចិត្តរបស់អ្នក និងគ្រប់មធ្យោបាយដែលអ្នកបានត្រួសត្រាយផ្លូវសម្រាប់គ្រប់គ្នា»។
សារនៅគេហទំព័រផ្លូវការរបស់អ្នកចម្រៀង Beyoncé បានបន្ថែមថា៖ «អ្នកគឺជាមនុស្ស ដែលមានភាពរឹងមាំ និងអត់ធន់។ អ្នកគឺតំណាងឲ្យអំណាច និងមហិច្ឆតា។ យើងទាំងអស់គ្នា ពិតជាមានសំណាងណាស់ ដែលបានឃើញនូវសន្ដានចិត្តដ៏ល្អ និងស្មារតីដ៏ក្លៀវក្លារបស់អ្នក ដែលនឹងស្ថិតនៅជារៀងរហូត»៕
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
