​គ្រួសារ​មួយ​នៅ​រដ្ឋ Mississippi កាលពី​ថ្ងៃ​ព្រហស្បតិ៍ (​ទី​២៥ ខែឧសភា​) បានទាមទារ​ឲ្យ​បណ្តេញ​មន្ត្រីនគរបាល​ចេញពី​ការងារ​និង​ត្រូវ​ចោទប្រកាន់​ពីបទ​ប្រើ​ហិង្សា ដោយ​ចេតនា ចំពោះ​ការបាញ់​ក្មេងប្រុស​អាយុ ១១​ឆ្នាំ​ម្នាក់ នៅពេលដែល​នគរបាល​បាន​ឆ្លើយតប ចំពោះ​ការហៅ​ទូរស័ព្ទ​រំខាន​របស់​កុមារ​នោះ​ឲ្យ​ទៅកាន់​ផ្ទះ​របស់គេ​។​

​មេធាវី​របស់​គ្រួសារ​ជនរងគ្រោះ លោក Carlos Moore បាន​និយាយថា ក្មេងប្រុស Aderrien Murry ដែល​បាន​ទូរស័ព្ទ​ទៅ​នគរបាល​តាម​ការ​ប្រាប់​របស់​ម្តាយ​ខ្លួន គឺ​ពុំមាន​កាន់​អាវុធ​ទេ និង​ធ្វើតាម​ការណែនាំ​របស់​ម​ន្ត្រី​ក្រុង Indianola លោក Greg Capers នៅពេលនោះ លោក Capers បាន​បាញ់​កុមារ​នោះ​ចំ​ដើមទ្រូង កាលពី​ព្រឹក​ថ្ងៃ​សៅរ៍ (​ទី​២០ ខែឧសភា​)​។​

​លោក Moore បាន​បន្ថែមថា ក្មេងប្រុស​នេះ បាន​ទូរស័ព្ទ​ទៅ​នគរបាល​ពី​ផ្ទះ បន្ទាប់ពី​ម្តាយ​របស់គេ​ឈ្មោះ​លោកស្រី Nakala Murry ត្រូវបាន​បុរស​ម្នាក់​គំរាមកំហែង នៅវេលា​ម៉ោង ៤​ព្រឹក (​ម៉ោង​ក្នុង​តំបន់​) ប៉ុន្តែ​លោក Capers បានធ្វើ​ឲ្យ​ស្ថានភាព​នោះ​កាន់តែ​រាលដាល​ឡើង ។ យោងតាម​សារព័ត៌មាន ABC News ដោយ​ដកស្រង់​សម្តី​លោកស្រី Murry បាន​ឲ្យ​ដឹងថា បុរស​នោះ​គឺជា​ឪពុក​របស់​ក្មេងប្រុស​រងគ្រោះ​។​

​លោក Moore បាន​និយាយថា​៖ «​យើង​កំពុង​ទាមទារ​យុត្តិធម៌​។ ក្មេងប្រុស​ស្បែក​ខ្មៅ​អាយុ ១១​ឆ្នាំ​ម្នាក់ នៅក្នុង​ទីក្រុង Indianola នឹង​បាត់​បង់ជីវិត បើ​គេ​ខិត​ចូលទៅ​បន្តិចទៀត​។ គាត់​មិនបាន​ធ្វើ​អ្វី​ខុស​ទេ ហើយ​គ្រប់យ៉ាង គឺ​ត្រឹមត្រូវ​»​។​

​យោងតាម​សារព័ត៌មាន CNN បាន​ឲ្យ​ដឹងថា ក្មេងប្រុស Murry ត្រូវបាន​បញ្ជូន​ទៅកាន់​មណ្ឌល​វេជ្ជសាស្ត្រ​នៃ​សាកលវិទ្យាល័យ Mississippi ដើម្បី​ព្យាបាល ហើយ​ត្រូវបាន​អនុញ្ញាត​ឲ្យ​ចេញ កាលពី​ថ្ងៃ​ពុធ (​ទី​២៤ ខែឧសភា​)​។​

​នាយកដ្ឋាន​នគរបាល មិនអាច​ទាក់ទង​សុំ​ការអធិប្បាយ​បានទេ តែ​សារព័ត៌មាន CNN បាន​រាយការណ៍​ថា ការិយាល័យ​ស៊ើបអង្កេត​រដ្ឋ Mississippi កំពុង​ស៊ើបអង្កេត​លើ​បញ្ហា​នេះ​៕​