កាយសម្ព័ន្ធ៖ ឯកឧត្ដមបណ្ឌិត ថោង ខុន រដ្ឋមន្ដ្រីក្រសួងទេសចរណ៍ និងជាប្រធានសហព័ន្ធកីឡាកាយសម្ព័ន្ធកម្ពុជាកាលពីចុងសប្ដាហ៍កន្លងទៅ បានចុះពិនិត្យទីតាំងហ្វឹកហាត់បណ្ដោះអាសន្នជាលក្ខណៈស្វ័យបុគ្គល របស់ក្រុមកីឡាកាយសម្ព័ន្ធជម្រើសជាតិកម្ពុជា នៅពហុកីឡដ្ឋានជាតិមរតកតេជោ និងបានសួរសុខទុក្ខកីឡាករ-កីឡាការិនីដែលកំពុងហ្វឹកហាត់នៅទីនោះផងដែរ។
ការចុះពិនិត្យទីតាំងហ្វឹកហាត់បណ្ដោះអាសន្ននេះ បន្ទាប់ពីសហព័ន្ធបានផ្លាស់ប្ដូរពីពហុកីឡដ្ឋានជាតិ ដែលជាទីតាំងបិទទ្វារហ្វឹកហាត់តាំងពីឆ្នាំ២០១៩ របស់ក្រុមកីឡាកាយសម្ព័ន្ធទៅពហុកីឡដ្ឋានជាតិមរតកតេជោ ក្រោយរាជរដ្ឋាភិបាលកម្ពុជាបានសម្រេចយកទីតាំងពហុកីឡដ្ឋានជាតិ ធ្វើជាកន្លែងព្យាបាលអ្នកជំងឺកូវីដ-១៩ កម្រិតស្រាលកាលពីពេលថ្មីៗកន្លងទៅ។ ឯកឧត្ដមបណ្ឌិត ថោង ខុន បានធ្វើការណែនាំដល់លោក ណយ ផាន់ណា អគ្គលេខាធិការសហព័ន្ធឲ្យយកចិត្តទុកដាក់ និងពង្រឹងសមត្ថភាពបច្ចេកទេសមូលដ្ឋានគ្រឹះ ឲ្យបានត្រឹមត្រូវដើម្បីត្រៀមខ្លួនឲ្យបានរួចរាល់ ពេលស្ថានភាពកូវីដប្រសើរឡើងវិញអាចធ្វើការហ្វឹកហាត់ជាមួយឧបករណ៍ ឬលំហាត់កម្រិតខ្ពស់ ក្នុងគោលដៅឆ្ពោះទៅរកឧត្ដមភាពជូនជាតិមាតុភូមិ សម្រាប់ត្រៀមស៊ីហ្គេមឆ្នាំ២០២៣។
ឆ្លៀតឱកាសនោះ ឯកឧត្ដមរដ្ឋមន្ត្រីក៏បានដើរពិនិត្យកន្លែងសម្រាកស្នាក់នៅ កន្លែងញាំអាហារ ជាមួយការណែនាំបន្ថែមឲ្យយកចិត្តទុកដាក់រក្សាអនាម័យ និងគោរពវិធានការក្រសួងសុខាភិបាល ពិសេសអនុវត្តតាមការណែនាំដ៏ខ្ពង់ខ្ពស់របស់សម្ដេចតេជោ ៣ការពារ ៣កុំ ដើម្បីចូលរួមទប់ស្កាត់ និងប្រយុទ្ធប្រឆាំងជាមួយជំងឺកូវីដ-១៩។ ទន្ទឹមជាមួយគ្នា ឯកឧត្ដមក៏បានឧបត្ថម្ភថវិកាផ្ទាល់ខ្លួនចំនួន ១០លានរៀលជូនដល់សហព័ន្ធកីឡាកាយសម្ព័ន្ធកម្ពុជា សម្រាប់ប្រើប្រាស់ក្នុងការហ្វឹកហាត់ផងដែរ។ លោក ណយ ផាន់ណា បានបញ្ជាក់ថា នេះគឺជាសកម្មភាពមិនអាចបំភ្លេចបាន ទោះបីក្នុងដំណាក់កាលដ៏លំបាកនៃការរីករាលដាលជំងឺកូវីដ-១៩ យ៉ាងណាក្ដីក៏ឯកឧត្តមរដ្ឋមន្ដ្រីបានយកចិត្តទុកដាក់ជានិច្ច ចំពោះមន្ដ្រីក្រោមឱវាទ ពិសេសកីឡាករ-កីឡាការិនីដែលកំពុងហ្វឹកហាត់ក្រោមដំបូលសហព័ន្ធ។ ក្នុងន័យនេះលោករំពឹងថា ទាំងគ្រូបង្វឹក និងកីឡាករ-កីឡាការិនីទាំងអស់នឹងស្ដាប់តាមការណែនាំ ហើយព្យាយាមហ្វឹកហាត់ ដើម្បីសម្រួចសមត្ថភាព ត្រៀមចូលរួមការប្រកួតថ្នាក់ជាតិ និងអន្ដរជាតិនានា។
សូមរំឭកថា បន្ទាប់ពីរាជរដ្ឋាភិបាលបានសម្រេចយកទីតាំងពហុកីឡដ្ឋានជាតិ ធ្វើជាកន្លែងព្យាបាលអ្នកជំងឺកូវីដ-១៩ កម្រិតស្រាល ដោយមានការសម្របសម្រួលពីក្រសួងអប់រំ គណៈកម្មាធិការជាតិអូឡាំពិកកម្ពុជា និងគណៈកម្មាធិការជាតិ CAMSOC បានរៀបចំឲ្យសហព័ន្ធមួយចំនួន ដែលបិទទ្វារហ្វឹកហាត់នៅពហុកីឡដ្ឋានជាតិ ប្ដូរទៅហ្វឹកហាត់បណ្ដោះអាសន្ននៅពហុកីឡដ្ឋានជាតិមរតកតេជោវិញ ក្នុងនោះក៏មានកីឡាកាយសម្ព័ន្ធផងដែរ ដែលបានរៀបចំទីតាំងហ្វឹកហាត់បណ្ដោះអាសន្នជាលក្ខណៈស្វ័យបុគ្គល ដើម្បីរក្សាគម្លាតសុវត្ថិភាព និងចូលរួមការពារជំងឺកូវីដ-១៩៕
អត្ថបទ៖ លី ឈុនឡា
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
