មន្ត្រីជាន់ខ្ពស់មួយរូប បាននិយាយកាលពីថ្ងៃសុក្រ (ទី២៦ ខែឧសភា) ប្រទេសស្រីលង្កា មានទំនុកចិត្ត ក្នុងការបំពេញតាមកាលកំណត់ នៅខែកញ្ញា ក្នុងការបញ្ចប់កិច្ចពិភាក្សារៀបចំរចនាសម្ព័ន្ធបំណុលជាមួយម្ចាស់បំណុល ខណៈដែលប្រទេសកំពុងរួបរឹតដោយបំណុលមយយនេះ ប្រឹងប្រែងយ៉ាងខ្លាំង ដើម្បីងើបចេញពីវិបត្តិហិរញ្ញវត្ថុដ៏អាក្រក់បំផុតរបស់ខ្លួន ក្នុងរយៈពេលជាច្រើនទសវត្សរ៍។

ប្រទេសស្រីលង្កា ដែលបានខកខានសងបំណុលបរទេសរបស់ខ្លួនជាលើកដំបូង ក្នុងប្រវត្តិសាស្ត្រ កាលពីខែមេសាឆ្នាំមុន ដោយសារទុនបម្រុងបរទេសនៅសល់តិចតួចបំផុត កំពុងពិភាក្សាជាមួយក្រុមម្ចាស់បំណុល និងម្ចាស់បំណុលទ្វេភាគីនានា ក្នុងនោះ រួមមានទាំងប្រទេសចិន ជប៉ុន និងឥណ្ឌា ដើម្បីដាក់បំណុលរបស់ខ្លួនឲ្យស្ថិតនៅលើផ្លូវប្រកបដោយនិរន្តរភាព និងផ្លាស់ប្តូរស្ថានភាពសេដ្ឋកិច្ច ដែលកំពុងតែយ៉ាប់យ៉ឺន។

ប្រធានាធិបតីស្រីលង្កា លោក Ranil Wickremesinghe អំឡុងដំណើរទស្សនកិច្ចទៅកាន់ទីក្រុងតូក្យូប្រទេសជប៉ុន ក្នុងសប្តាហ៍នេះ បាននិយាយថា ប្រទេសស្រីលង្កា គួរតែអាចបញ្ចប់ការចរចាររៀបចំរចនាសម្ព័ន្ធឡើងវិញ នៅខែកញ្ញា ឬយូរបំផុត ក្នុងខែវិច្ឆិកា ដោយលោកបន្ថែមថា ការចរចាមានវឌ្ឍនភាពគួរឲ្យកត់សម្គាល់។

ស្រីលង្កាទទួលបានថវិកាសង្គ្រោះចំនួន ២,៩ពាន់លានដុល្លារអាមេរិកពីមូលនិធិរូបិយវត្ថុអន្តរជាតិ ឬIMF នៅក្នុងខែមីនា ហើយប្រទេសនេះកំពុងកំណត់គោលដៅនៃការបញ្ចប់កិច្ចពិភាក្សាអំពីបំណុលឲ្យស្របទៅនឹងការពិនិត្យឡើងវិញលើកដំបូងរបស់កម្មវិធី ដែលត្រូវបានរំពឹងទុក ក្នុងខែកញ្ញា។

ប្រទេសស្រីលង្កាជំពាក់បំណុលចំនួន ៧,១ពាន់លានដុល្លារអាមេរិក សម្រាប់ការខ្ចីទ្វេភាគី ដោយជំពាក់ចិន ៣ពាន់លានដុល្លារ ឥណ្ឌា ១,៦ពាន់លានដុល្លារ និងជំពាក់ បំណុលចំនួន ២,៤ពាន់លានដុល្លារ ចំពោះ Paris Club ជាក្រុមប្រទេសម្ចាស់បំណុល។

រដ្ឋាភិបាល ក៏ត្រូវចរចាឡើងវិញនូវបំណុលជាង ១២ពាន់លានដុល្លារ ក្នុងមូលបត្របំណុលអឺរ៉ូ ជាមួយម្ចាស់បំណុលឯកជន នៅបរទេស និង ២,៧ពាន់លានដុល្លារលើកម្ចីពាណិជ្ជកម្មផ្សេងទៀត៕