ហូឡង់ ៖ នាយករដ្ឋមន្ត្រីហូឡង់លោក Mark Rutte បាននិយាយកាលពីថ្ងៃសុក្រទី២៦ ខែឧសភាថា ប្រទេសហូឡង់​កំពុងពិចារ​ណាយ៉ាងហ្មត់ចត់ ក្នុងការបញ្ជូនយន្តហោះប្រយុទ្ធF-16 ទៅឲ្យប្រទេសអ៊ុយក្រែន ប៉ុន្តែពុំទាន់បាន​ធ្វើការសម្រេច​ចិត្តចុងក្រោយ​ណាមួយនៅឡើយ។ កាលពីដើមសប្តាហ៍នេះ ប្រទេសហូឡង់ បាននិយាយថា ខ្លួនមានបំណងចាប់ផ្តើមការ​បណ្តុះបណ្តាល​អាកាសយានិកអ៊ុយក្រែនក្នុងការប្រើប្រាស់យន្តហោះ F-16 ឲ្យបានកាន់តែឆាប់តាមដែលអាចធ្វើទៅបាន។ 

នៅពេលត្រូវបានសួរថាតើប្រទេសហូឡង់នឹងបញ្ជូនយន្តហោះប្រយុទ្ធទៅកាន់ប្រទេសអ៊ុយក្រែនឬទេ លោក Rutte បាននិយាយទៅកាន់សន្និសីទសារព័ត៌មានថា ពុំមានការសម្រេចចិត្តចុងក្រោយត្រូវបានធ្វើឡើងនៅឡើយ ប៉ុន្តែលោកបាននិយាយថាប្រសិនបើអ្នកចាប់ផ្តើមបណ្តុះបណ្តាល វាប្រាកដណាស់ថា រឿងអ្វីៗអ្នកកំពុងតែ​ពិចារណាយ៉ាងហ្មត់ចត់។ លោក Rutte និយាយថា ការសម្រេចចិត្តណាមួយក្នុងការបញ្ជូនយន្តហោះ F-16 វាអាស្រ័យលើការយល់ព្រមពីសហរដ្ឋអាមេរិក​ដើម្បីធ្វើដូច្នេះ។ យោងតាមតួលេខពីក្រសួងការពារជាតិហូឡង់បានឲ្យដឹងថា ប្រទេសហូឡង់បច្ចុប្បន្នមានយន្តហោះF-16 ដែលធ្វើប្រតិបត្តិការចំនួន២៤គ្រឿង ដែលនឹងបញ្ចេញជាដំណាក់កាលនៅពាក់កណ្តាលឆ្នាំ២០២៤ ហើយ​យន្តហោះ១៨គ្រឿងផ្សេង​ទៀត​បច្ចុប្បន្នកំពុងដាក់លក់ ដែលក្នុងចំណោមនេះ ១២គ្រឿងត្រូវបានលក់ជា​បណ្តោះអាសន្ន។ កាលពីថ្ងៃសុក្រទី១៩ ខែឧសភា ប្រធានាធិបតីសហរដ្ឋអាមេរិក លោក Joe Biden បានគាំទ្រកម្មវិធីបណ្តុះបណ្តាលសម្រាប់អាកាសយានិកអ៊ុយក្រែន​ឲ្យចេះប្រើប្រាស់យន្តហោះ F-16 ហើយប្រធានាធិបតីអ៊ុយក្រែនលោក Volodymyr Zelenskiy បានធានាដល់លោកBiden ថា យន្តហោះនឹងមិនត្រូវបាន​ប្រើប្រាស់ដើម្បីឆ្លងចូលទៅក្នុងទឹកដីរុស្ស៊ីឡើយ។ ប្រទេសលោកខាងលិចនិយាយថា ខ្លួនមានបំណងជួយអ៊ុយ​ក្រែនវាយឲ្ររុស្ស៊ីបរាជ័យ ប៉ុន្តែបានទទូចដដែលៗថាខ្លួនមិនចង់បង្កការប្រឈមមុខដាក់គ្នាដោយផ្ទាល់​រវាងសម្ព័ន្ធមិត្ត​យោធាណា​តូគាំទ្រដោយសហរដ្ឋអាមេរិក ជាមួយរុស្សីនោះទេ។