ស្វីស ៖ ក្រុមអ្នកគាំទ្របានសម្រុកទៅកាន់គេហដ្ឋានដ៏ធំស្កឹមស្កៃមានតម្លៃ៧៦លានដុល្លាររបស់លោកស្រី Tina Turner នៅប្រទេសស្វីស ដើម្បីធ្វើការគោរពវិញ្ញាណក្ខន្ធរបស់រាជិនីនៃតន្ត្រីរ៉ុកខិនរ៉ូល (Rock 'n' Roll) ដែលបានលាលោកនេះគ្មានថ្ងៃត្រឡប់ កាលពីថ្ងៃពុធ ក្នុងវ័យ៨៣ឆ្នាំ។

អ្នកកាន់ទុក្ខទាំងនោះ បានដាក់បាច់ផ្កា និងអុជទៀន នៅច្រកទ្វារចូលនៃភូមិគ្រឹះរបស់ម្ចាស់ជយលាភីពានរង្វាន់ Grammy ដែលមានទីតាំងនៅបឹង Zurich ក្នុងទីក្រុង Küsnacht ដ៏ស្ងាត់ជ្រងំ។

អ្នកស្រុកម្នាក់បានប្រាប់សារព័ត៌មាន Reuters ថា៖ «នៅពេលដែលលោកស្រីដើរកាត់ លោកស្រីញញឹម លោកស្រីអាចមានអារម្មណ៍ថា យើងកំពុងសំឡឹងមើលលោកស្រី ប៉ុន្តែតែងតែងបង្ហាញនូវអ្វីដែលជាលក្ខណៈសាមញ្ញបំផុត»។ រីឯអ្នកស្រុក Küsnacht ម្នាក់ទៀត ក៏បានទុកផ្កានៅខាងក្រៅគេហដ្ឋានរបស់លោកស្រី Turner ហើយបាននិយាយមកកាន់អ្នកសារព័ត៌មានថា៖ «លោកស្រីគឺជាអ្នកជិតខាងដ៏ល្អម្នាក់ ហើយនៅពេលដែលលោកស្រីបង្ហាញខ្លួននៅក្នុងទីក្រុង គ្រប់គ្នាស្រឡាញ់ចូលចិត្តលោកស្រីខ្លាំងណាស់»។

លោកស្រី Turner ដែលកើតនៅរដ្ឋ Tennesse បានបោះបង់សញ្ជាតិអាមេរិករបស់លោកស្រី ដើម្បីក្លាយជាពលរដ្ឋស្វីសពេញសិទ្ធិ ក្នុងឆ្នាំ២០១៣ ពោលគឺក្នុងឆ្នាំតែមួយ ដែលលោកស្រី និងលោក Erwin Bach បានភា្ជប់ចំណងអាពាហ៍ពិពាហ៍ជាមួយគ្នា។ លោកស្រី Turner ត្រូវបានធ្វើរោគវិនិច្ឆ័យថា មានជំងឺមហារីកពោះវៀន នៅឆ្នាំ២០១៦ និងបានទទួលការប្តូរតម្រងនោម នៅឆ្នាំ២០១៧។

លោកស្រី Tina Turner ត្រូវបានប្រកាសថា បានទទួលមរណភាពដោយជរាពាធ កាលពីថ្ងៃពុធ (ទី២៤ ខែឧសភា) ដោយអ្នកផ្សព្វផ្សាយព័ត៌មានរបស់លោកស្រី បានឲ្យដឹងនៅក្នុងសេចក្តីថ្លែងការណ៍មួយថា៖ «លោកស្រី Tina Turner ដែលជារាជិនីតន្រ្តីរ៉ុកខិនរ៉ូល (Rock'n'Roll) បានទទួលមរណភាព ដោយជរាពាធ នៅថ្ងៃនេះ ក្នុងវ័យ៨៣ឆ្នាំ បន្ទាប់ពីមានជំងឺដ៏យូរ នៅផ្ទះរបស់លោកស្រី ក្នុងក្រុង Kusnacht ក្បែរ ក្រុង Zurich ប្រទេសស្វីស»៕