សៀមរាប៖ ឯកឧត្តមរដ្ឋមន្ត្រី ឌិត ទីណា រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ បានអំពាវនាវដល់​ប្រជា​កសិករនៅក្នុងស្រុកសូត្រនិគម ខេត្តសៀមរាប ពង្រីកការដាំដុះបន្លែសុវត្ថិភាព ក្នុងផ្ទះសំណាញ ហើយ​ក្រសួងនឹង​ជួយគាំទ្រ តាមរយៈគម្រោង និងផែនការមួយចំនួន ។

នៅក្នុង​សំណេះសំណាលជាមួយម្ចាស់កសិដ្ឋាន និងប្រជាសហគមន៍ដាំបន្លែ ក្នុងភូមិសំរោងជើង ឃុំសំរោង ស្រុកសូត្រនិគម កាលពីថ្ងៃទី២៦ ខែឧសភា ឆ្នាំ២០២៣ ឯកឧត្តម ឌិត ទីណា មានប្រសាសន៍ថា ម្ចាស់កសិដ្ឋាន និងប្រជាសហគមន៍នៃបណ្តុំអាជីវកម្មបន្លែ ត្រូវសហការគ្នាខិតខំបន្ថែមទៀត ផលិតបន្លែទៅតាមតម្រូវការទីផ្សារ កុំឲ្យលើសពីផែនការផលិតនាំតែ ខាតបង់ពេលវេលា ថវិកា និងធ្លាក់ថ្លៃ ។

ឯកឧត្តម បន្តថា ប្រជាកសិករដែលដាំបន្លែក្នុងផ្ទះសំណាញ់ ត្រូវសហការជាមួយមន្ទីរ ដៃគូពាក់ព័ន្ធ ដើម្បីសិក្សាពី​បច្ចេកទេស ពូជ និងពិនិត្យទៅលើព័ត៌មានកសិកម្ម ឱ្យទាន់ពេលវេលា ដោយភ្ជាប់ជាមួយផែនការច្បាស់លាស់ ដើម្បីផលិតបានគុណភាពល្អ ស្របតាមតម្រូវការទីផ្សារទទួលបានតម្លៃខ្ពស់ ធានាបានប្រសិទ្ធភាព និងនិរន្តរភាព​សេដ្ឋកិច្ច ក្នុងការជួយលើកស្ទួយវិស័យកសិកម្មឱ្យកាន់តែរីកចម្រើន ។

ឯកឧត្តមរដ្ឋមន្ត្រី បានបន្ថែមថា ចំពោះការងារដាំបន្លែសុវត្ថិភាព ក្នុងផ្ទះសំណាញ់នេះ ក្រសួងក៏មានគម្រោងជួយដល់​កសិករផងដែរ គឺការផ្ដល់នូវប្រាក់កម្ចីដល់កសិករ ក្នុងអត្រាការប្រាក់ទាប ឬស្ទើរមិនយកការប្រាក់ ឲ្យពលរដ្ឋសាងសង់​ផ្ទះសំណាញ់ ចំពោះការបង់រំលោះវិញ នៅពេលកសិករប្រមូលផល ហើយប្រាក់នោះបន្តយកទៅផ្ដល់ឲ្យកសិករផ្សេងៗ សាងសង់ផ្ទះសំណាញបន្ថែមទៀត ។

ប្រជាពលរដ្ឋនៅស្រុកសូត្រនិគម បានបង្ហាញនូវការគាំទ្រ ចំពោះគម្រោងរបស់ក្រសួងកសិកម្មនេះ ព្រោះពួកគាត់ពេញ​ចិត្ត​នឹងការដាំបន្លែក្នុងផ្ទះសំណាញ ដែលកំពុងមានការគាំទ្រច្រើន ពីប្រជាពលរដ្ឋនៅទូទាំងប្រទេស ហើយក៏​ជាឱកាសនាំទៅកាន់ទីផ្សារអន្តរជាតិ ។

គួរបញ្ជាក់ថា បច្ចុប្បន្នការដាំបន្លែសុវត្ថិភាព ក្នុងផ្ទះសំណាញនៅកម្ពុជា កំពុងមានការផុលផុសច្រើននៅទូទាំងប្រទេស ខណៈទីផ្សារកំពុងមានតម្រូវការច្រើន រួមទាំងមានតម្លៃគួរសម ធ្វើឲ្យកសិករអ្នកដាំ ទទួលបានផលចំណេញច្រើន ៕

អត្ថបទ ៖ បាន សុខរិទ្ធិ