កូរ៉េខាងត្បូង ៖ ទីភ្នាក់ងារសារព័ត៌មាន Yonhap បានរាយការណ៍ថា អ្នកដំណើរម្នាក់នៅលើជើងហោះហើរនៃយន្តហោះរបស់ក្រុមហ៊ុនអាកាសចរណ៍ Asiana (Asiana Airlines) បានប្រាប់នគរបាលថា រូបគេបានបើកទ្វារនៅលើយន្តហោះរយៈពេលប៉ុន្មាននាទី មុនពេលយន្តហោះនោះចុះចតនៅទីក្រុង Daegu ប្រទេសកូរ៉េខាងត្បូងកាលពីថ្ងៃសុក្រ ដោយសារតែខ្លួនស្ថិតក្នុងទីតាំង «គ្មានផាសុកភាព»។

ទីភ្នាក់ងារសារព័ត៌មាន Yonhap បានឲ្យដឹងដោយសំអាងដល់ការលើកឡើងពីស្ថានីយនគរបាល Daegu Dongbu ដែលថា អ្នកដំណើរដែលមានវ័យខ្ទង់៣០ឆ្នាំរូបនោះ បានប្រាប់នគរបាលថា ខ្លួនបើកទ្វារដោយសារតែ «ចង់ចុះពីយន្តហោះឲ្យបានលឿន» ហើយក៏បានប្រាប់នគរបាលទៀតថា រូបគេមានអារម្មណ៍តានតឹង ក្រោយពីបាត់បង់ការងារ កាលពីពេលថ្មីៗនេះ។

សារព័ត៌មាន Reuters មិនអាចទាក់ទងទៅប៉ុស្តិ៍នគរបាលបានភ្លាមៗនោះឡើយ។ បុរសនោះ បានបើកទ្វារ នៅពេលយន្តហោះមានកម្ពស់ប្រហែល ៧០០ហ្វីត (២១៣ម៉ែត្រ) ពីដី ដែលបង្កឲ្យមានការភ័យស្លន់ស្លោនៅលើយន្តហោះនោះ។

អ្នកដំណើរ ៩នាក់ ត្រូវបានបញ្ជូនទៅមន្ទីរពេទ្យ ដោយសារមានបញ្ហាផ្លូវដង្ហើម តែមន្ត្រីនាយកដ្ឋានពន្លត់អគ្គិភ័យម្នាក់ បានប្រាប់ថា អ្នកទាំងអស់នោះ ត្រូវបានអនុញ្ញាតឲ្យចេញពីមន្ទីរពេទ្យហើយ ប្រហែលពីរម៉ោងក្រោយមក។ យោងតាមសារព័ត៌មាន Yonhap ដដែល បានបន្ថែមថា នគរបាលគ្រោងនឹងចាប់ឃុំខ្លួនបុរសនោះ បន្ទាប់ពីបញ្ចប់ការស៊ើបអង្កេត៕