ភ្នំពេញ៖ ឯកឧត្តម ហ៊ុន ម៉ាណែត បានថ្លែងថា សមិទ្ធផលសន្តិភាពស្ថិរភាពគឺជាពរជ័យ និងទ្រព្យសម្បត្តិ ដ៏មហាសាលសម្រាប់ប្រជាជន ​និងប្រទេសជាតិខ្មែរទាំងមូល ដូច្នេះបងប្អូនជន​រួមជាតិ​ទាំងអស់គប្បីបន្ត ​ថែរក្សាសុខសន្តិភាពនេះឲ្យបានគង់វង្សគ្រប់កាលៈទេសៈទាំងអស់។

ថ្លែងនៅក្នុងពិធីបញ្ចុះខណ្ឌសីមា និងសម្ពោធសមិទ្ធផលនានាក្នុងវត្តជ្រោយអំពិល ស្ថិតនៅក្នុង​សង្កាត់ក្បាលកោះ ខណ្ឌច្បារអំពៅ រាជធានីភ្នំពេញ នាថ្ងៃទី២៧ ខែឧសភា ឆ្នាំ២០២៣​នេះ ​ឯកឧត្តម ហ៊ុន ម៉ាណែត បានលើកឡើងថា «សមិទ្ធផលសន្តិភាព និងស្ថិរភាព ដូចដែលយើងកំពុងមាន​បច្ចុប្បន្ននេះ គឺជាពរជ័យ និងជាទ្រព្បសម្បត្តិដ៏មានតម្លៃមហាសាល​សម្រាប់​ជាតិ និងប្រជាជន ដែលយើងទាំងអស់គ្នាអាចមើលឃើញយ៉ាងជាក់ស្តែង ធៀបនឹងអតីតកាលដ៏សែនជូរចត់ខ្លោច​ផ្សាដែលជាតិខ្មែរយើងធ្លាប់បានហែលឆ្លងកាត់អស់រយៈកាលជាង ៥០០ ឆ្នាំកន្លងមក នៅមុនសម័យតេជោសន្តិភាពនេះ»។

ឯកឧត្តម បានបន្តទៀតថា« សន្តិភាព បានកើតឡើងដោយលំបាក ប៉ុន្តែអាចនឹងរលាយបាត់ទៅវិញ​យ៉ាង​ផុយស្រួយ​ក្នុងពេលដ៏ខ្លីប្រសិនបើយើងធ្វេសប្រហែស។ ដូច្នេះសូមប្រជាពលរដ្ឋទាំងអស់​បន្តរួបរួមក្នុងធ្លុងសាមគ្គី ដើម្បីបន្តថែរក្សាសន្តិភាព និងភាពសុខសាន្តសុខដុមរមនារបស់សង្គមជាតិ​យើងឱ្យបានគង់វង្សតរៀងទៅសម្រាប់កូនចៅជំនាន់ក្រោយតាមរយៈការបន្តផ្តល់ទំនុកចិត្តចំពោះការដឹកនាំប្រកបដោយគតិបណ្ឌិតរបស់ ​សម្តេចតេជោ ដូចដែលយើងធ្លាប់ទទួលបានភាពកក់ក្តៅ​អស់រយៈកាលជាង​ ៤០ ឆ្នាំនេះ កន្លងមកហើយ»។

នៅក្នុងឱកាសនោះដែរឯកឧត្តម ​ហ៊ុន ម៉ាណែត ក៏បាន រួមអនុមោទនាបុណ្យ និង​អបអរសាទរ​ចំពោះសមិទ្ធផលថ្មីបន្ថែមសម្រាប់វត្តជ្រោយអំពិល ​ដែលមានអាយុកាលជាង ២២០ឆ្នាំដែល​បានឆ្លងកាត់ជាច្រើនជំនាន់ទាំងក្នុងសម័យកាលសង្គ្រាមវឹកវរខ្លាំង,សម័យកាលរីកចម្រើនក្រោមព្រះរាជបូជនីយកិច្ចដឹកនាំ​របស់​អតីត​ព្រះមហាក្សត្រ ​ព្រះបរមរតនកោដ្ឋ, សម័យកាលជម្លោះបែក​បាក់​ផ្លាស់ប្តូរ​បបគ្រប់គ្រង ដែលបាននាំឈានទៅការកាប់សម្លាប់ប្រជាជនខ្មែរខ្លួនឯង​យ៉ាងរង្គាល​ក្នុងរបបខ្មៅ​ងងិត ៣ ឆ្នាំ ៨ ខែ និង២០ ថ្ងៃ ដោយនៅពេលនោះទីអារាម ​បានរងនូវការបំផ្លិចបំផ្លាញ ហើយ​ព្រះសង្ឃត្រូវបានចាប់ផ្សឹក និងសាសនាត្រូវបានលុបបំបាត់ទាំងស្រុង។

ឈានមកដល់សម័យតេជោសន្តិភាព, សមិទ្ធផលជាច្រើនត្រូវបានកសាងរីកចម្រើនឡើងវិញ​ទាំងផ្នែក​ពុទ្ធចក្រអាណាចក្រ និងអាណាចក្រ។ គ្រប់សាសនាទាំងអស់ បានដើរតួនាទីដ៏មាន​សារៈសំខាន់​ក្នុងសង្គម ពីព្រោះថាបើគ្មានសាសនាទេ​ គឺប្រទេសជាតិនឹងជួបទុក្ខលំបាក ដោយសារ​ប្រជាពលរដ្ឋ​នឹងប្រព្រឹត្តអំពើខុសឆ្គង ​ដោយលែងខ្វល់អំពីបុណ្យបាប ហើយសង្គមទាំងមូល​នឹងបាត់បង់​សីលធម៌ ​និងគុណធម៌ ​ដែលជាគុណតម្លៃ និងសេចក្តីថ្លៃថ្នូរក្នុងការរស់នៅ​ក្នុង​ភាព​ជាមនុស្ស៕អត្ថ៖ បទបានចក់