មនុស្សរាប់ម៉ឺននាក់បានជំម្នះនឹងភ្លៀងធ្លាក់ និងខ្យល់ក្នុងទីក្រុងបែលក្រាដ(Belgrade) កាលពីថ្ងៃសៅរ៍នៅក្នុងការតវ៉ាប្រឆាំងរដ្ឋាភិបាល ជុំវិញការបាញ់ប្រហារសម្លាប់រង្គាលចំនួនពីរលើក ដែលបានសម្លាប់មនុស្សចំនួន១៨ នាក់ ដោយបានដាក់ការស្តីបន្ទោសការស្លាប់លើវប្បធម៌នៃអំពើហិង្សា ដែលក្រុមអ្នករិះគន់និយាយថា អាជ្ញាធរបានអនុញ្ញាតឲ្យចូលក្នុងសង្គម។

កាលពីថ្ងៃទី ៣ ខែឧសភា ក្មេងប្រុសជំទង់ម្នាក់បានសម្លាប់សិស្សសាលាចំនួន៩ នាក់ និងសន្តិសុខ ម្នាក់ក្នុងទីក្រុង Belgrade នៅក្នុងការបាញ់ប្រហារដ៏រង្គាលនៅសាលារៀនលើកដំបូង ក្នុងប្រទេសស៊ែរប៊ី ហើយមួយថ្ងៃក្រោយមកបុរសអាយុ ២១ ឆ្នាំម្នាក់បានសម្លាប់មនុស្ស ៨នាក់ ទៀតនៅខាងក្រៅទីក្រុងនេះ។

គណបក្សប្រឆាំងដែលរៀបចំការជួបជុំនេះ បានបន្ទោសរដ្ឋាភិបាលដែលដឹកនាំដោយគណបក្ស​ជឿនលឿនស៊ែរប៊ី (SNS) ចំពោះការខកខានក្នុងការគ្រប់គ្រងប្រព័ន្ធផ្សព្វផ្សាយ ដែលបាន​ជំរុញឲ្យមានអំពើហិង្សា និងធ្វើសកម្មភាពប្រឆាំងនឹងច្បាប់ឧក្រិដ្ឋកម្មនៅក្នុងសង្គម។

នេះគឺជាការតវ៉ាលើកទី៤ក្នុងរយៈពេលជាច្រើនសប្តាហ៍ ដែលមានចំនួនក្រុមបាតុករកើនឡើង​ស្រដៀងគ្នាទៅនឹងការប្រមូលផ្តុំគ្នាកាលពី៣លើកមុន បើទោះបីជាអាកាសធាតុអាប់អួរ​បែបនេះក៏ដោយ។

មនុស្សម្នា បានចេញតវ៉ាពេញផ្លូវជុំវិញបរិវេណទីតាំងទូរទស្សន៍រដ្ឋ RTS ដោយអំពាវនាវឲ្យលោក ប្រធានាធិបតី Aleksandar Vucic រដ្ឋមន្ត្រីក្រសួងមហាផ្ទៃលោក Bratislav Gasic និង លោកAleksandar Vulin នាយកទីភ្នាក់ងារសន្តិសុខជាតិរបស់ប្រទេសស៊ែរប៊ីលាលែងពីតំណែង។ ពួកគេក៏ទាមទារឲ្យផ្ដល់សេរីភាពសារព័ត៌មានកាន់តែល្អប្រសើរបន្ថែមទៀតផងដែរ៕