រដ្ឋមន្ត្រីក្រសួងពាណិជ្ជកម្មអាមេរិកលោកស្រី Gina Raimondo បាននិយាយកាលពីថ្ងៃសៅរ៍ទី ២៧ខែ ឧសភា ថា រដ្ឋមន្ត្រីពាណិជ្ជកម្មរបស់ប្រទេសចំនួន ១៤ នៅក្នុងកិច្ចពិភាក្សាក្របខ័ណ្ឌសេដ្ឋកិច្ចឥណ្ឌូ-ប៉ាស៊ីហ្វិកហៅកាត់ថា (IPEF) ដែលដឹកនាំដោយសហរដ្ឋអាមេរិក បានបញ្ចប់ការពិភាក្សាដ៏សំខាន់ លើកិច្ចព្រមព្រៀងមួយដើម្បីធ្វើឲ្យខ្សែសង្វាក់ផ្គត់ផ្គង់កាន់តែមានភាពធន់និងសុវត្ថិភាព បន្ថែមទៀត ។

លោកស្រី Raimondo បានប្រាប់សន្និសីទសារព័ត៌មានបន្ទាប់ពីកិច្ចប្រជុំថ្នាក់រដ្ឋមន្ត្រីនៅទីក្រុង Detroit សហរដ្ឋអាមេរិកថាកិច្ចព្រមព្រៀងនោះ ដំណាក់ដំបូង អំពាវនាវឲ្យប្រទេសនានាបង្កើតក្រុមប្រឹក្សា ដើម្បីសម្របសម្រួលសកម្មភាពខ្សែសង្វាក់ផ្គត់ផ្គង់ និងបណ្តាញឆ្លើយតបវិបត្តិ ដើម្បីផ្តល់ការព្រមាន ជាមុនដល់ប្រទេស IPEF អំពីការរំខានការផ្គត់ផ្គង់ដែលអាចកើតមាន។

កិច្ចព្រមព្រៀងនេះ នឹងផ្តល់បណ្តាញទំនាក់ទំនងបន្ទាន់មួយសម្រាប់បណ្តាប្រទេស IPEF ដើម្បីស្វែង រកការគាំទ្រក្នុងអំឡុងពេលមានការរំខានដល់ខ្សែសង្វាក់ផ្គត់ផ្គង់ ការសម្របសម្រួលកាន់តែជិតស្និទ្ធ ក្នុងអំឡុងពេលមានវិបត្តិ និងងើបឡើងវិញកាន់តែឆាប់រហ័សជាងមុន។

លោកស្រី Raimondo បានលើកឡើងពីការខ្វះខាតនៃ ឧបករណ៍បន្ទះអេឡិចត្រូនិក ក្នុងអំឡុងពេល​ជំងឺរាតត្បាតសកល COVID-19 ដែលបានបិទផលិតកម្មរថយន្តរបស់អាមេរិក ដោយធ្វើឲ្យកម្មករ​រាប់ពាន់នាក់​ឈប់សម្រាកគ្មានការងារធ្វើ៕