នគរបាលបាននិយាយថា អ្នកដំណើរម្នាក់ នៅលើយន្ដហោះរបស់ក្រុមហ៊ុនអាកាសចរណ៍ Asiana Airlines (អេស៊ានណា អ៊ែរឡាញ) ដែលបានបើកទ្វារនៅលើយន្ដហោះ ប៉ុន្មាននាទីមុនពេល​យន្ដហោះនោះ ចុះបតនៅក្នុងទីក្រុង ដេហ្គូ(Daegu) កាលពីថ្ងៃសុក្រនោះ គឺមានស្មារតីមិនល្អ។

លោក គីម ជុងឆាន់ មន្រ្ដីនគរបាលម្នាក់មកពីស្នងការនគរបាល ដេហ្គូ ដុងប៊ូ(Daegu Dongbu) បាននិយាយថា បុរសរូបនេះ គឺកំពុងតស៊ូ នឹងបញ្ហាខួក្បាលនៅពេលនេះ ហើយយើងមិនអាច​ស៊ើបអង្គេត​ឲ្យបានដិតដល់បានទេ​ ដោយសារសតិរបស់គេមិនល្អ។

យោងតាមទូរទស្សន៍ខ្សែកាប្លិ៍ក្នុងស្រុក Channel YTN ដែលស្រង់ប្រភពពីស្នងការនគរបាល ដេហ្គូ ដុងប៊ូ បាននិយាយថា បុរសរូបនោះ មានវ័យខ្ទង់ ៣០ឆ្នាំ ហើយត្រូវបានគេស្គាល់ត្រឹមតែនាមត្រកូល លី(Lee) ប៉ុណ្ណោះ បានប្រាប់នគបាលថា ការដែលរូបគេបើកទ្វារនេះ ពីព្រោះតែស្ថានភាពនៅទីនោះ គ្មានផាសុកភាព ហើយចង់ចុះពីលើយន្ដហោះឲ្យបានឆាប់។

បុរសនោះ ​បានប្រាប់សមត្ថកិច្ចថា រូបគេមានអារម្មណ៍តានតឹងខ្លាំងបន្ទាប់ពីបាន​បាត់បង់​ការងារធ្វើ​កាលពីពេលថ្មីៗនេះ។

ទូរទស្សន៍ប៉ុស្ដិ៍ YTN បាននិយាយថា នគរបាលមានផែនការ​ដាក់​ពាក្យសុំដីកាចាប់ខ្លួន​ប្រឆាំង​នឹងបុរសនោះ បន្ទាប់ពីការស៊ើបអង្គេត​ឧបទ្ទវហេតុនោះ​ បញ្ចប់ទៅ ដែលបានធ្វើអោយអ្នក​ដំណើរ៩នាក់ ត្រូវបាន​បញ្ជូនទៅមន្ទីរពេទ្យ ​ដោយសារតែមានបញ្ហាផ្លូវដង្ហើម៕ អត្ថបទ៖ មករា