របាយការណ៍ដោយក្រុមអ្នកស្រាវជ្រាវសិទ្ធមនុស្សក្នុងតំបន់ (CARDH) បាននិយាយកាលពីថ្ងៃអាទិត្យថា អំពើហិង្សាដោយក្រុមជនអន្ធពាលប្រដាប់អាវុធ បានធ្លាក់ចុះយ៉ាងច្រើន ចាប់តាំងពីការលេចឡើងនៃចលនាយុត្តិធម៌អ្នកតាំងខ្លួនជាអ្នកការពារ ដែលបានមើលឃើញឧក្រិដ្ឋជនដែលសង្ស័យ១៦០នាក់ បានស្លាប់កាលពីខែមុន។

ស្ថានភាពនៅក្នុងប្រទេសតំបន់សមុទ្រការ៉ាអ៊ីបមួយនេះ នៅតែគ្រោះថ្នាក់ខ្លាំង ខណៈក្រុមជនអន្ធពាលប្រដាប់អាវុធធុនធ្ងន់បន្តជំរុញវិបត្តិមនុស្សធម៌ ដែលបានបណ្តាល​ឲ្យមនុស្សរាប់ម៉ឺននាក់ភៀសខ្លួនចេញក្នុងពេលមានការចាប់ជំរិតញឹកញាប់ ដើម្បីទាមទាប្រាក់ ការចាប់រំលោភដោយក្រុមជនអន្ធពាល ការធ្វើទណ្ឌកម្ម និងឃាតកម្ម។

ចលនាអ្នកការពារ ដែលគេស្គាល់ថា«Bwa Kale» បានចាប់ផ្តើមបន្ទាប់ពីពលរដ្ឋនៅរដ្ឋធានីព័រអូប្រាំង បានសម្លាប់និងដុតសមាជិកជនអន្ធពាលដែលសង្ស័យរាប់សិបនាក់ កាលពីពេលព្រឹកថ្ងៃទី២៤ ខែមេសា។

ក្រុមអ្នកស្រាវជ្រាវសិទ្ធិមនុស្សក្នុងតំបន់ (CARDH) បាននិយាយថា ស្ទើរតែគ្មានការចាប់ជំរិត ត្រូវបាន​គេកត់ត្រាក្នុងខែកន្លងទៅនេះ ហើយមានករណីឃាតកម្មពាក់ព័ន្ធទៅនឹងជនអន្ធពាល ៤៣ករណី ដែលបានធ្លាក់ចុះពី១៤៦ករណី នៅក្នុងរយៈពេល៣សប្តាហ៍ដំបូងនៃខែមេសា។

ទីក្រុងព័រអូប្រាំង ដែលក្រុមសិទ្ធិមនុស្ស CARDH បានប៉ាន់ប្រមាណពេលនេះ ៦០ភាគរយ​ត្រូវបានគ្រប់គ្រងដោយជនអន្ធពាលប្រដាប់អាវុធ ដែលស្ថិតនៅក្នុងនាយកដ្ឋាន Ouest របស់ប្រទេសហៃទី ជាកន្លែងដែលដែលមានឃាតកម្មរបស់ក្រុមអ្នកតាំងខ្លួន​ជា​អ្នកការពារដែលក្រុមសិទ្ធិមនុស្សបានកត់ត្រា រួមមានការសម្លាប់ដោយព្យួរក គប់ដោយដុំថ្ម វាយដំ និងដុតសម្លាប់ជាដើម។