អាជ្ញាធររបស់ក្រុង Venice ប្រទេសអ៊ីតាលី កំពុងធ្វើការស៊ើបអង្កេត បន្ទាប់ពីទឹកមានពន្លឺពណ៌បៃតង លេចចេញ កាលពីព្រឹកថ្ងៃអាទិត្យ នៅក្នុងព្រែកធំ (Grand Canal) ដ៏ល្បីល្បាញ។

ប្រធានគ្រប់គ្រងតំបន់ Veneto លោក Luca Zaia បានសរសេរនៅលើបណ្ដាញសង្គម Twitter ថា៖ «នៅព្រឹកនេះ សារធាតុរាវមានពន្លឺពណ៌បៃតង បានលេចឡើងក្នុងព្រែក Grand Canal របស់ទីក្រុង Venice ដែលត្រូវបានរាយការណ៍ដោយអ្នកស្រុកមួយចំនួន នៅជិតស្ពាន Rialto។ អភិបាលតំបន់ បានកោះប្រជុំបន្ទាន់ជាមួយនគរបាល ដើម្បីស៊ើបអង្កេតរកប្រភពនៃសារធាតុរាវនេះ»។

អ្នកនាំពាក្យអភិបាលតំបន់ បានប្រាប់សារព័ត៌មាន CNN ថា ពួកគេបានយកសំណាកទឹកភ្លាមៗ ដោយពិនិត្យមើលខ្សែហ្វីលរបស់កាម៉ារ៉ាសុវត្ថិភាព និងសួរអ្នកចែវទូក និងអ្នកបើកការណូត នៅមូលដ្ឋានថា តើពួកគេបានឃើញអ្វីគួរឲ្យសង្ស័យ ឬទេ មុននឹងមានកោះប្រជុំបន្ទាន់មួយ ដើម្បីស៊ើបអង្កេតមូលហេតុ ដែលនាំឲ្យទឹកមានពណ៌បៃតងនេះ ដោយកត់សម្គាល់ថា គ្មានក្រុមបរិស្ថានណាមួយ បានអះអាងទទួលខុសត្រូវនោះឡើយ។

ទ្រឹស្ដីជាច្រើន បានលេចឡើងនៅលើបណ្ដាញអ៊ិនធឺណិត ដោយក្នុងនោះរួមទាំងទ្រឹស្ដីដែលថា វាអាចជាសារាយ ឬសារធាតុ ដែលដាក់ចូលក្នុងព្រែកដោយខុសច្បាប់។ នេះមិនមែនជាលើកទីមួយនោះទេ ដែលព្រែក Grand Canal របស់ទីក្រុង Venice បានជួបប្រទះនូវការប្រែពណ៌ទឹកនេះ៕