ភ្នំពេញ៖ គណៈប្រតិភូកីឡាអាស៊ានប៉ារ៉ាហ្គេម បានមកដល់កម្ពុជាហើយ ខណៈក្រុមអត្តពលិករបស់ហ្វីលីពីន​ដំបូងគេ​នឹងមកដក់កម្ពុជានៅយប់នេះ។

ស្របពេលព្រឹត្តិការណ៍ប្រកួតកីឡាអាស៊ានប៉ារ៉ាហ្គេមលលើកទី១២ ដែលកម្ពុជាធ្វើជាម្ចាស់ផ្ទះកាន់តែខិតជិតមកដល់ នៅថ្ងៃទី២៩ ខែឧសភា ឆ្នាំ២០២៣នេះ នៅអាកាសយានដ្ឋានអន្តរជាតិភ្នំពេញ ចាប់ផ្តើមមានការមក​ដល់របស់​គណៈប្រតិភូ​រៀបចំ​កីឡាអាស៊ានប៉ារ៉ាហ្គេម និងអាជ្ញាកណ្តាល មកពីថៃ ម៉ាឡេស៊ី ចិនជាបណ្តើរៗ ខណៈនៅយប់នេះនឹង​មានការមករបស់ក្រុមអត្តពលិកជាង១០០នាក់ នឹងមកដល់នៅពាក់កណ្តាល​យប់នេះមក​ពីប្រទេសហ្វីលីពីន។

បើតាម លោកឧត្តមសេនីយ៍ត្រី ថោង សុផាត នាយរងប៉ុស្តិ៍ច្រកទ្វារអាកាសយានដ្ឋានអន្តរជាតិភ្នំពេញ បានឲ្យដឹងថា ដោយសារអត្តពលិកអាស៊ានប៉ារ៉ាហ្គេមជាកីឡាមានពិការភាព នគរបាលជំនាញ សហការជាមួយក្រុមការងារ​គណៈកម្មធិការប៉ារ៉ាហ្គេមបានរៀបចំក្រុមការងារសម្របសម្រួលបន្ថែម ដើម្បីបង្កលក្ខណៈងាយស្រួល​ដល់​អត្តពលិក​អំឡុងពេលមកដល់កម្ពុជា និងការបំពេគបែបបទឆ្លងដែនជាដើម។

ជាមួយគ្នានេះ គណៈប្រតិភូទទួលបន្ទុកជាអាជ្ញាកណ្តាលមកពីប្រទេសចិន បង្ហាញការពេញចិត្តចំពោះការ​រៀបចំ​កីឡាអាស៊ានប៉ារ៉ាហ្គេម ដោយចាត់ទុកថា ព្រឹត្តិការអាស៊ានប៉ារ៉ាហ្គេមនៅកម្ពុជា នឹងលើកទឹកចិត្ត​ដល់​ប្រជាជន​អាស៊ានដែលពិការភាពផងដែរ។

គួរបញ្ជាក់ថា ការមកដល់របស់ក្រុមអត្តពលិកជនពិការមកពីប្រទេសហ្វីលីពីនដំបូងគេនៅយប់នេះ នឹងចូលរួមប្រកួត​លើប្រភេទ៧កីឡា ដូចជា កីឡាបាល់បោះជនពិការ, កីឡាវាយសីជនពិការ, កីឡាអុកជនពិការ, កីឡាបាល់ទាត់​ចលករខួរក្បាល, កីឡាយូដូជនពិការ, កីឡាលើកទម្ងន់ជនពិការ,កីឡាហែលទឹកជនពិការ ខណៈសល់៥ថ្ងៃ​ទៀតប៉ុណ្ណោះ ព្រឹត្តិការណ៍កីឡាអាស៊ានប៉ារ៉ាហ្គេមនឹងចាប់ផ្តើមហើយពីថ្ងៃទី៣ ដល់ថ្ងៃទី៩ ខែមិថុនាខាងមុខ៕ ដោយ ៖ ឧត្ដម