សារព័ត៌មានរដ្ឋអ៊ីរ៉ង់រាយការណ៍ថា ព្រះចៅស៊ូតង់របស់ប្រទេសអូម៉ង់ Haitham bin Tariq al-Said បានជួបពិភាក្សាការងារជាមួយប្រធានាធិបតីអ៊ីរ៉ង់លោក Ebrahim Raisi នៅក្នុងទី​ក្រុង​តេ​អេរ៉ង់ កាលពីថ្ងៃអាទិត្យ ពេលដែលព្រះអង្គបានយាងមកដល់សម្រាប់ដំណើរទស្សនកិច្ចរយៈពេល ២ថ្ងៃ ដោយផ្តោតសំខាន់លើបញ្ហាការទូត និងសន្តិសុខដំណើរ​ទស្សនកិច្ចនេះ បាន​កើត​មាន​រយៈពេល ២ថ្ងៃប៉ុណ្ណោះ ក្រោយទីក្រុង Muscat សម្របសម្រួលការដោះដូរអ្នកទោសរវាងអ៊ីរ៉ង់ និងបែលហ្ស៊ិក។ 

អូម៉ង់ បានក្លាយជាគូសន្ទនាជាយូរមកហើយសម្រាប់លោកខាងលិច ជាមួយអ៊ីរ៉ង់ ហើយពួកគេបានសម្របសម្រួលឲ្យមានការដោះលែងពលរដ្ឋបរទេសជាច្រើន និងពលរដ្ឋដែល​មាន​សញ្ជាតិ២។ 

កាលពីថ្ងៃសុក្រសប្តាហ៍មុន អូម៉ង់ បានជួយឲ្យមានការដោះលែងបុគ្គលិកជំនួយបែលហ្ស៊ិកម្នាក់ ដែលត្រូវបានចាប់ខ្លួនកាលពីឆ្នាំ ២០២២ និងត្រូវបានកាត់ទោស​ឲ្យជាប់​ពន្ធនាគាររយៈ​ពេ​ល​ ៤០ឆ្នាំ និងត្រូវបានវាយ ៧៤រំពាត់ ពាក់ព័ន្ធនឹងករណីចោទប្រកាន់ជាច្រើន រួមទាំងការធ្វើចារកម្មផងដែរ ជាការដោះដូរនឹងមន្រ្តីការទូតអ៊ីរ៉ង់ម្នាក់ ដែលត្រូវបាន​កាត់ទោស​ឲ្យជាប់​ពន្ធនា​គារ​​រយៈពេល ២០ឆ្នាំ ពាក់ព័ន្ធនឹងការរៀបចំផែនការវាយប្រហារដោយគ្រាប់បែកពុំបានសម្រេចនៅក្នុងប្រទេសបារាំងទូរទស្សន៍​រដ្ឋអ៊ីរ៉ង់រាយការណ៍ថា អ៊ីរ៉ង់ និងអូម៉ង់ នឹងចុះហត្ថលេ​ខា​លើកិច្ចព្រមព្រៀងយ៉ាងហោច ៤កិច្ចព្រមព្រៀងលើវិស័យសេដ្ឋកិច្ច ការវិនិយោគ និងថាមពល ហើយព្រះចៅស៊ូតង់ Haitham និងលោក Raisi គ្រោងនឹងពិភាក្សាលើបញ្ហាជាច្រើនទៀត ដូច​ជាបញ្ហាទំនាក់ទំនងតានតឹងរបស់ទីក្រុងតេអេរ៉ង់ ជាមួយអេហ្ស៊ីប និងកម្មវិធីនុយក្លេអ៊ែរជាប់ក្នុងជម្លោះរបស់ប្រទេសអ៊ីរ៉ង់៕