ភ្នំពេញ ៖ អ្នកសម្របសម្រួលតំណាងអង្គការសហប្រជាជាតិ (UN ) ប្រចាំនៅកម្ពុជា លោក ចូសិប ស៊ូអើ បានថ្លែងថា អង្គការសហប្រជាជាតិ ពិតជាមានសេចក្តីត្រេកអរយ៉ាងខ្លាំងក្រោយឃើញនារីរបស់កម្ពុជាកាន់តែច្រើន ចូលរួម​ជាកម្លាំងរក្សាសន្តិភាពក្រោមឆ័ត្រអង្គការសហប្រជាជាតិ ខណៈមានការចូលរួមរបស់ស្រ្តីកាន់តែច្រើននេះ មានន័យ​ថាការរក្សាសន្តិភាពកាន់តែមានប្រសិទ្ធភាពបន្ថែមទៀតនោះ។

 ថ្លែងក្នុងឱកាសអញ្ជើញចូលរួមក្នុងពិធី«ទិវាអន្តរជាតិកងកម្លាំងរក្សាសន្តិភាពអង្គការ សហប្រជាជាតិ International Day of UN Peacekeepers» ព្រមទាំងដាក់កម្រងផ្ការំលឹកវិញ្ញាណក្ខន្ធ កម្លាំងរក្សាសន្តិភាព ដែលបានពលីជីវិត​ក្នុងតំបន់បេសកកម្មក្រោមឆ័ត្រ អង្គការសហប្រជាជាតិ នៅសាលាហ្វឹកហ្វឺនកងកម្លាំងរក្សាសន្តិភាពពហុជាតិ ខេត្តកំពង់ស្ពឺ(អាស៊ីអូ) នាព្រឹកថ្ងៃទី២៩ ខែឧសភា ឆ្នាំ២០២៣នេះ លោក ចូសិប ស៊ូអើ បានលើកឡើងថា លោកពិតជាមានសេចក្តីត្រេកអរចំពោះនារី ដែលបានចូលរួមជា កម្លាំងរក្សាសន្តិភាពរបស់អង្គការសហប្រជាតិ។ ការចូលរួមពីសំណាក់ស្រ្តីកាន់តែច្រើន ការរក្សាសន្តិភាព កាន់តែមានប្រសិទ្ធភាព ហើយមួយវិញទៀតកម្លាំង​រក្សាសន្តិភាពជាស្រ្តីធ្វើឲ្យប្រសើរឡើងនូវការអនុវត្តការ រក្សាសន្តិភាពជារួម មានសិទ្ធចូលរួមក្នុង​សហគមន៍កាន់​តែច្រើន ជួយលើកម្ពស់សិទ្ធិមនុស្ស និងការពារជន ស៊ីវិល ព្រមទាំងលើកទឹកចិត្តស្រ្តីឲ្យក្លាយ​ជាផ្នែកមួយដ៏​មានអត្ថន័យនៃដំណើរការសន្តិភាព និងនយោបាយ ជាដើម។

លោកចូសិប ស៊ូអើ បានសង្កត់ធ្ងន់ថា«កម្លាំងរក្សាសន្តិភាពស្រ្តីមិនត្រឹមតែផ្តល់ការគាំទ្រដល់សន្តិ ភាព និងសន្តិសុខពិភពលោកប៉ុណ្ណោះទេក៏ប៉ុន្តែពួកគេក៏ជាអ្នកដឹកនាំផ្លូវផងដែរ»។ លោកបន្តថា អង្គការ សហប្រជាជាតិពិតជាមានសេចក្តីរីករាយចំពោះយុវជន និងយុវនារីកម្ពុជាដែលបានចូលរួមជាកម្លាំងមួក ខៀវកាន់តែច្រើន ហើយការចូលរួមកាន់តែច្រើននេះគឺបានក្លាយទៅជាគ្រួសារមួយរបស់អង្គការសហប្រជា ជាតិផងដែរ។

ជាមួយនឹងការបញ្ជួនស្រ្តីកម្ពុជាទៅបំពេញបេសកកម្មកាន់តែច្រើននៅក្រៅប្រទេសនេះ សម្តេច ពិជ័យសេនាទៀ បាញ់ ឧបនាយករដ្ឋមន្រ្តី រដ្ឋមន្រ្តីក្រសួងការពារជាតិកម្ពុជាបានថ្លែងអះអាងថា រាជរដ្ឋាភិ បាលកម្ពុជា បានប្តេជ្ញាចិត្តយ៉ាងមុតមាំ និងគ្មានថ្ងៃងាក់រ៉េក្នុងការជម្រុញបង្កើនការប្រើប្រាស់កម្លាំងនារី«យេនឌ័រ» ឲ្យបាន២៥ភាគរយនៅគ្រប់បេសកកម្មរក្សាសន្តិភាពទំាងក្នុងកង និងនៅទីបញ្ជាការ ពិសេសតួ នាទីជានាយទាហានសេនាធិការ និងសង្កេតការណ៍យោធា សម្រាប់ធានានិរន្តរភាព នៃការចូលរួមបំពេញ បេសកកម្មរក្សាសន្តិភាពយូរអង្វែង ព្រមទាំងផ្តោតសំខាន់ទៅលើសកម្មភាពក្នុងវិស័យរក្សាសន្តិភាពមួយចំ នួនទៀត ដែលកម្ពុជាមានលទ្ធភាពចូលរួម។

សូមបញ្ជាក់ថា តាំងពីឆ្នាំ២០០៦រហូតមកដល់ឆ្នាំ២០២៣នេះ កម្លាំងកម្ពុជាសរុបចំនួន ៨,៨៥៩នាក់ក្នុងនោះនារី ចំនួន៦៨១នាក់ បានចេញបំពេញបេសកកម្មក្នុងប្រទេសចំនួន៩ហើយ​បន្ទាប់ពីមានការស្នើរសុំរបស់​អង្គការ​សហប្រជាជាតិ។ប្រទេសដែលបានចូលរួមបំពេញបេសកកម្មនោះរួមមាន៖ប្រទេសសាធារណរដ្ឋស៊ូដង់, ស៊ូដង់ខាងត្បូង, ឆាដ, អាហ្វ្រិកកណ្តាល, លីបង់, ម៉ាលី, ស៊ីរី, សាយប្រឺស និងយេមែនជាដើម។ បច្ចុប្បន្នកម្លាំងកម្ពុជាចំនួន ៧៨៨នាក់ ក្នុងនោះនារី ចំនួន១៣០នាក់ កំពុងបំពេញបេសកកម្ម នៅប្រទេសចំនួន៤ រួមមាន៖ សាធារណរដ្ឋស៊ូដង់ខាងត្បូង លីបង់ អាហ្វ្រិកកណ្តាល និងម៉ាលី។

នៅក្នុងឱកាសប្រារព្ឋទិវាអន្តរជាតិកងកម្លាំងរក្សាសន្តិភាពអង្គការសហប្រជាជាតិលើកទី៧៥នេះ ដែរសម្តេចពិជ័យ​សេនាទៀ បាញ់ ក៏មិនបានភ្លេចថ្លែងអំណរគុណចំពោះបងប្អូនប្រជាជនកម្ពុជា ដែល បានស្ម័គ្រចិត្តលះបង់កូនចៅ ប្តីសី ឲ្យបំពេញការងាររក្សាសន្តិភាព ដើម្បីចូលរួមបំពេញបេសកកម្មរបស់ អង្គការសហប្រជាជាតិនេះដែរ៕

អត្ថបទ ៖ បាន ចក់​