កាលពីថ្ងៃអាទិត្យម្សិលមិញ ក្រុមសាច់ញាតិអ្នកដែលត្រូវបានសម្លាប់នៅក្នុងសង្រ្គាមស៊ីវិលអៀរឡង់ បានចូលរួមព្រឹត្តការណ៍រំឭកខួបអនុស្សាវរីយ៍ នៅទីក្រុង Dublinដើម្បីប្រារព្ធខួប ១០០ឆ្នាំ ចាប់តាំងពីការបញ្ចប់ជម្លោះ។

លោកនាយករដ្ឋមន្រ្តី Leo Varadkar និងឧបនាយករដ្ឋមន្រ្តីរបស់គាត់ លោក Micheál Martin បានដាក់កម្រងផ្កានៅសួនអនុស្សាវរីយ៍ Garden of Remembrance ។

ទូរទស្សន៍អៀរឡង់ RTE រាយការណ៍ថា ក្រុមសាច់ញាតិជាច្រើនរបស់អ្នកស្លាប់មកពីភាគីជម្លោះទាំង ២ បានចូលរួមព្រឹត្តការណ៍នេះផងដែរ ។

គួរឲ្យដឹងថា សង្រ្គាមស៊ីវិលអៀរឡង់ ដែលធ្វើឲ្យមានការបែងចែកមិត្តភ័ក្តិ ក្រុមគ្រួសារ និងទីក្រុងទូទាំងប្រទេស បានផ្ទុះឡើងនៅថ្ងៃទី ២៨ ខែមិថុនា ឆ្នាំ ១៩២២ និងបានបញ្ចប់ទៅវិញនៅថ្ងៃទី ២៤ ខែឧសភា ឆ្នាំ ១៩២៣ ។ គេបានប៉ាន់ស្មានថា មនុស្សប្រហែល ២ពាន់នាក់ ស្លាប់នៅក្នុងជម្លោះមួយនេះ ៕