ប្រធានាធិបតីអ៊ុយក្រែន លោក Volodymyr Zelenskiy បានដាក់ចេញសេចក្តីស្នើច្បាប់ដែលនឹងមើលឃើញអ៊ុយក្រែនដាក់ទណ្ឌកម្មសម្ព័ន្ធមិត្តរុស្ស៊ីគឺប្រទេសអ៊ីរ៉ង់រយៈពេល ៥០ឆ្នាំ ដើម្បីជាការឆ្លើយតបចំពោះអ្វីដែលទីក្រុងគីវ និយយថា គឺជាការផ្គត់ផ្គង់អាវុធរបស់ទីក្រុងតេអេរ៉ង់ ដល់ទីក្រុងម៉ូស្គូ។ នេះបើយោងតាមការអះអាងរបស់នាយអគ្គសេនាធិការកងទ័ពអ៊ុយក្រែនលោក Andriy Yermak បានឲ្យដឹងកាលពីថ្ងៃអាទិត្យ។
ទីក្រុងគីវ និងសម្ព័ន្ធមិត្តរបស់ពួកគេនិយាយថា អ៊ីរ៉ង់ បានផ្គត់ផ្គង់អាវុធដល់រុស្ស៊ី ដែលរួមទាំងយានដ្រូនរាប់រយគ្រឿង ចាប់តាំងពីទីក្រុងម៉ូស្គូ បើកការវាយលុកលើអ៊ុយក្រែន កាលពីឆ្នាំមុន។ ទោះបីជាយ៉ាងណាក៏ដោយ ទីក្រុងតេអេរ៉ង់ បានច្រានចោលទាំងស្រុងការចោទប្រកាន់បែបនេះ។
បើសិនជាត្រូវបានអនុម័តដោយសភាពិតមែន សេចក្តីស្នើច្បាប់នេះ នឹងបញ្ឈប់ការដឹកជញ្ជូនទំនិញអ៊ីរ៉ង់ឆ្លងកាត់អ៊ុយក្រែន និងការប្រើប្រាស់ដែនអាកាសរបស់ពួកគេ ក៏ដូចជាដាក់ទណ្ឌកម្មពាណិជ្ជកម្ម ហិរញ្ញវត្ថុ និងបច្ចេកវិទ្យា លើអ៊ីរ៉ង់ និងពលរដ្ឋរបស់ពួកគេ។
ទីក្រុងគីវ បាននិយាយកាលពីថ្ងៃអាទិត្យថា ទីក្រុងម៉ូស្គូ បានបើកការវាយប្រហារដោយយានដ្រូនទ្រង់ទ្រាយធំបំផុតលើអ៊ុយក្រែនពុំធ្លាប់មានមកទល់នឹងពេលនេះ កាលពីយប់កន្លងទៅ ដោយពួកគេប្រើប្រាស់យានដ្រូនផលិតនៅអ៊ីរ៉ង់ចំនួន ៥៤គ្រឿង ៕