ទីភ្នាក់ងារអវកាសចិន (CMSA) បានប្រកាសនៅពីថ្ងៃចន្ទនេះថា យានអវកាស Shenzhou-16 ដែលមានអវកាសនាយនិកអ្នកបញ្ជា នឹងត្រូវបាញ់បង្ហោះពីមជ្ឈមណ្ឌលបាញ់បង្ហោះផ្កាយរណប Jiuquan នៅភាគពាយព្យនៃប្រទេសចិន នៅសាវេលាម៉ោង ៩:៣១នាទីព្រឹកថ្ងៃអង្គារ ម៉ោងនៅទីក្រុងប៉េកាំង។
អវកាសយានិកចិនបីនាក់ ឬ «Taikonaut» គឺលោក Jing Haipeng លោក Zhu Yangzhu និងលោក Gui Haichao នឹងក្លាយជានាវិករបស់យានអវកាស Shenzhou-16 ដោយមានលោក Jing ជាមេបញ្ជាការបេសកកម្ម លោក Zhu ជាវិស្វករហោះហើរអវកាស និងលោក Gui ជាអ្នកជំនាញបន្ទុក។
យានបេសកម្មមានអវកាសយានិកជាមនុស្ស Shenzhou-16 ដែលជាយានបេសកកម្មមានអវកាសយានិកដំបូងគេបង្អស់ ចាប់តាំងពីស្ថានីយ៍អវកាសរបស់ប្រទេសចិន បានចូលដល់ដំណាក់កាលអនុវត្ត និងអភិវឌ្ឍ នឹងធ្វើការជួបគ្នាដោយស្វ័យប្រវត្តិយ៉ាងលឿនភ្លាមៗ ក្នុងគន្លង ហើយចូលចតនៅកំពង់ផែរ៉ាឌីកាល់នៃម៉ូឌូលស្នូល Tianhe ដោយបង្កើតបានជាការរួមបញ្ចូលគ្នានៃម៉ូឌូលបី និងយានអវកាសបី។
ចំណែកក្រុមអវកាសយានិក Shenzhou-15 នឹងត្រឡប់ទៅកន្លែងចុះចត Dongfeng នៅភាគខាងជើងប្រទេសចិនវិញ បន្ទាប់ពីបានបញ្ចប់បេសកកម្មផ្លាស់វេន ក្នុងគន្លងតារាវិថី ជាមួយអវកកាសយានិក Shenzhou-16។
លោក Lin Xiqiang នាយករងនៃទីភ្នាក់ងារអវកាសចិន CMSA បានប្រាប់ឲ្យដឹងថា អវកាសយានិករបស់យានអវកាស Shenzhou-16 នឹងស្នាក់នៅក្នុងស្ថានីយអវកាសប្រហែល ៥ខែ ហើយក្នុងអំឡុងពេលស្នាក់នៅនេះ ភារកិច្ចចម្បងរបស់ពួកគេ រួមមានការបញ្ជូនអវកាសយានិក ទៅក្នុងគន្លងតារាវិថី ពីអវកាសយានិករបស់យានអវកាស Shenzhou-15 អនុវត្តការពិសោធន៍វិទ្យាសាស្ត្រ សាកល្បងកម្មវិធីផ្ទុកទំនិញ អនុវត្តសកម្មភាពក្នុង និងក្រៅយានអវកាស និងកិច្ចការដឹកទំនិញចេញពីម៉ូឌូល ដំឡើងបន្ទុកក្នុង និងក្រៅយានអវកាស ព្រមទាំងការងារថែទាំនិងជួសជុលស្ថានីយអវកាស។
អវកាសយានិករបស់យានអវកាស Shenzhou-16 ត្រូវបានរំពឹងថា នឹងចុះចតនៅទីតាំងចុះចត Dongfeng ក្នុងខែវិច្ឆិកា បន្ទាប់ពីជួបជាមួយអវកកាសយានិករបស់យានអវកាស Shenzhou-17៕