បេក្ខភាពប្រធានាធិបតីទួរគី លោក Kemal Kilicdaroglu បានជំរុញអ្នកគាំទ្ររបស់លោកឱ្យបន្តការតស៊ូរបស់ពួកគេ ខណៈដែលលោកបានត្អូញត្អែរថា សំឡេងឆ្នោតភាគច្រើនត្រូវបានបង្វែរទៅគាំទ្រលោកប្រធានាធិបតី ថាយីប អឺដូហ្គាន់ ។

បន្ទាប់ពីលទ្ធផលដំបូងបង្ហាញថាលោក Kilicdaroglu ចាញ់ការបោះឆ្នោត លោកបានប្រាប់អ្នកគាំទ្ររបស់ខ្លួននៅទីក្រុងអង់ការ៉ាថា "សូមឱ្យការតស៊ូដើម្បីលទ្ធិប្រជាធិបតេយ្យនៅរស់ ដើម្បីខ្លួនអ្នក ដើម្បីកូនរបស់អ្នក អ្នកចូលនិវត្តន៍ ដើម្បីម្តាយ និងឪពុករបស់យើង សម្រាប់កសិករ ព្រមទាំងពាណិជ្ជកររបស់យើង។

លោក Kilicdaroglu បានមានប្រសាសន៍ថា "យើងបានជួបប្រទះការបោះឆ្នោតដ៏អយុត្តិធម៌បំផុតក្នុងរយៈពេលប៉ុន្មានឆ្នាំថ្មីៗនេះ។ គ្រប់មធ្យោបាយរបស់រដ្ឋត្រូវបានប្រមូលផ្ដុំសម្រាប់គណបក្សនយោបាយមួយ។ លទ្ធភាពទាំងអស់ត្រូវបានដាក់នៅក្រោមជើងរបស់មនុស្សម្នាក់"។

លោក Kilicdaroglu ដែលទទួលបានសំឡេងគាំទ្រប្រហែល ៤៧,៩% នៅក្នុងការបោះឆ្នោតកាលពីថ្ងៃអាទិត្យបាននិយាយថា លទ្ធផលបោះឆ្នោតបានបង្ហាញពីឆន្ទៈរបស់ប្រជាជនក្នុងការផ្លាស់ប្តូររដ្ឋាភិបាលផ្តាច់ការមួយ៕